Cv̀mré góng dvjáwe cìróng bángkà svng vgám:ò wervt New York kèní Franciscan shvrúngshú tiqgǿ tung 6 shvlá vjá lv́m vmíng gv̀l bǿà we.

Cv̀mré góng dvjáwe cìróng bángkà svng vgám:ò wervt New York kèní Franciscan shvrúngshú tiqgǿ tung 6 shvlá vjá lv́m vmíng gv̀l bǿà we.

Àngnø Catholic Shvrúng shú tiqgǿ íwe mvtaq cv̀mré gong àngmè rì cv̀mré gong dvjá we dangrì svng gø zaq zaq vgám we íe. Àngnø Fr. Fidelis Moscinski, CFR ínø àng kaq svng tung 6 shvlá shvrúng lv́m vmíng dvjá bǿà we íe. 
Yalòng vmíng nø cv̀mré gong àngmè rì cv̀mré dvjá we cìróng bángkà taq lóngdø̀ngrì, shǿngkømrì taqkèní vgám nø gvraqā bǿà we rvt wedø mvrà zíò wegø íe. 
Yalòng vmíng svng mvsatā we dvrá vjìpè Steven Tiscione taqkèní we shvrúng shú pè svng tung 6 shvlá shvrúng lv́m vjønvt nà we íe. Yadø cv̀mré góngrì svng dvjáā we nø vsv̀ng shvtwe bv̀nlì wawe ínø we bv̀nlì taqkèní wulaq wavm wegø íe wanø Father Fidelis MOscinski í dvrá róng svnggø shún shìbǿì we íe. 

Shǿn mvyǿwe àng mvtú nø we cìróng svng dira nø cv̀mré góng dvjáshì we vsv̀ngrì yv́ngkèní cì dvpǿ lushìwe, røtvm we wáshìe. Yalòng nø mvrà shèrwe cv̀mré goni cèrì ò lvpatrì svng shvt we bv̀nlì tiqlòng ni íe. Wedø shvt we dvjà svng yv̀ng bǿò we cv̀mré àngmè rìò nøt mvsø̀nrì svng gø nøt dammá zí ò we nvng vbóng we íe. 
Father Fidelis taqekèní shúnshì we kàrì nø mvrà shèrwe cv̀mré cèrì dvpvt àngmaq ò lvpat rì svng shvlut lúnlv́m vgámā we ku kèní ripā we ni íe. Àngshø̀n we taq yadø vléshì we dvrá uqbvdi rì svng vgám we bv̀nlì wawe nø kadø gø mvrà vle wanø shǿn mvlúnshì. Pàwálv́m wani nø vsv̀ngrì lvpat dvpvt vjú mvzi we dvrá dangrì svng sat we nø vsv̀ngrì ò lvpat vsvkrì svng mvkok weni íe wae. 

Yalòng nø we dvrá vjì pè taqkèní shvrúngshú tiqgǿ kaqsv̀ng vháng vtangwe dvrá, vmíng dvjáò we gø íwe svng shálún shìe. Yalòng vmuq nø vle á:mìwe nǿng July 7, 2022 taq we cv̀mré góng dvjáò we cìróng bángkà svng vgám, gvraqā ò we yv́ngkèní Fr. Moscinski svng tvp:ò we vmuq kèní bø̀nráì we gø íe. 
Fr. Fidelis nø vzàng kaqgø we dø cv̀mré gong dvjáò we bv̀nlì rì svng vgám dvzaqshì wervt tvp:mò we vhǿm yv̀ngà we taq ya boqnø tung shvrúng lv́m høqshaq vmíng gv̀l bǿà we vhǿm bǿà.