Cvmré rì svng màdvrá dø wáshàìrì svng nvr:ìnø àngmaq dvpvt shvlanø yáng vnvp we laqyàrì taq kèní tùbum shàì

Cvmré rì svng màdvrá dø wáshàìrì svng nvr:ìnø àngmaq dvpvt shvlanø yáng vnvp we laqyàrì taq kèní tùbum shàì

Cvmré rìò vko vkángrì svng roqgarì wenø vsvng shvngbeò bvnlì døngjár íe. Téwa mvjàn gvsvt we shvràrì vdòng taq vl vdu we cvmrérì svng dvdam a:lvm vchyake.

1982 August 19 ni taq Palestine mvjàn nvng sing nø mòngàn rvpdoq (UN) zupùng taq June 4 ni nø mvrà madá shvnip shvnar we vhømò we cvmrérìò àngni wa nø mvsvt bøà we íe. Dèniò tvnù magá nø mòngàn taq cvmrérìò góng nøtmvsøn dvng màdvrá dø shvnip shvnarò we vhømò lòng svng dvsháza nønt taq kèní dvdam lúnlvm dvpvt íe.

We dø írvtnø cvmrérìò vkovkáng svng roqgvrã lún lvm dvpvt dèni taq mòngàn rvpdoq UN taq kèní dvkám yàngà we íe. We lòng bvnlì dvlàrì svng lvwandø tøp tøp wa wálún lvm dvpvt mòngàn svngpvn vko vkáng kàru nvng cvmrérìò vko vkáng Convention mvdò taq kèní shølshú wáshì bøì.

Mòngàn rvpdoq bvnlì àngkàngpè Xavier Perez De Cuillar í shønbøà we taq Mòngàn rvpdoq kèní wápvng bøà we bvnlì yalòngnø gvzà vchyak we mvtaq ringnø dvgùng vl we bvnlì døngjá gø íe wanø dvkám bøà. Mòngàn taq cvmré 50 sèn ján dángte nø mvjànrì nvng màdvrá we vdòngrì taq shvnip shvnar kéò we vhømòe. Mvnyam kéòe, màdvrá dø bvnlìrì vdøk vnvng dvzvŕòe, shvnip shvnarò e, shvtò we vhømòe, nvm:vm we vhømòrì mòngàn shvrà vràm taq bøn ráì we íe.

Yàdø ílòng svng vgám lúnlvm nøngmaqí kadø wàì?

Cvmrérì svng dvng àngpvn pvn taq kèní shvnip shvnarò we vhømò lòngsvng sháì we rvt cvmrérì svng mvjàn, mvgam màshvla we bvnlìrì taq kèní vsar we shvrà taq gvl lvm kàsvdiq kámshì shaq íbø shà. Cvmrérìò lvpvt shvla dø cúnshì lún lvm tùbum shì lvm dvkám shaq íbøì nìgø dèní hoqshaq dvtøp shì we mvl lòng svng yánglún shìe.

Asia nvng Africa móngdànrì taq cvmrérì dvhø paqzí cvnshì mvlúnò we, dvkøq wangnø ám:aq lvm dvshà we, AIDS yóga nvng mvjànrì dvhø taq lvpvt cøm:vmì we gvzà vl:ámì. Vháng mvnshì we móngdànrì taq ni vràm cvmré 40000 gø dvkøq wàng vdòng taq shi mvnshìe wa nø mòngàn rvpdoq UN taq kèní dvk mvsvtòe. We wamvtaq legapaqzí mvsha we nvng AIDS yóga vkøn we vdòng taqøgø cvmrérìò lvpvt svng màshvla dø vyuq dvzvŕòe. Dèni la lvpvt taq cvmrérì dvpvt màshvla nø svre dvké we shvngkàrì gún dvtøp lvm gø gvzà yak we íe.

Svrabín koqkámpè Francisò mòngkà taq gø cvmrérìò lvpvt nvng àngmaq gø vrvmò dvgùng svng vpø shvring rà we svng shøn dvkám bøa. Gvray àng góng mvrshvm nvng vbóng dø pvn bøà we ínì gø màdvrá dø shvnip shvnarò we vdòng taq vháng lún lvm dvngrì nvng shóngnøt rì vtoshì mvlúnò wanø shøne.

Cvmrérì svng màdvrádø bvnlì wá dvzvŕò we, vré shì we nvng nvm:vmò we rìsvng nvrà:vmì. Dèniò cvmrérì nø nøngmaq dvpvt nvpniò shølshúrì írvtnø àngmaq svng tùbum shài. Ya mòngàn cvmrérìò vko vkáng àngni svng vpøì weí nøngmaq shvngbe taq kèní cvmrérì dvpvt téwa mòngzøl we dvgøq shøm shvràrì dvgøa dvzaq shì rà:vmì.

#source-Fr.NikhilGomes