"Dvshá mvhøtri kaq vmlvm aqlvm nvng vl-lvmchømrì dvgøālvm íwe vsuyaqò rvmvngzøng rì dvpvt American Catholic svradorì taq kèní vtoò we shvngkà"

"Dvshá mvhøtri kaq vmlvm aqlvm nvng vl-lvmchømrì dvgøālvm íwe vsuyaqò rvmvngzøng rì dvpvt American Catholic svradorì taq kèní vtoò we shvngkà"

Kàdvngté mà-lé kè American vsuyaq taqkèní dvshá mvhøtri vmlvm aqlvm nvng vl-lvmchøm dvgøā nø wàlvm dvtanò lòng svng American Catholic Svrado gvbarì taqkèní vtobøā we íe. Covid 19 Zønlì vsher we yóga rvt vmlvm aqlvm nvng dvgøshì lvm chøm màdá we Vsvng (15) % rvmshì we dāng, dvpvng we taq gòng we gvmsùng mà-vl døngku rì nvng shiqshàn tvrà nvng vbóng we vmlvm aqlvm rì dvgøshì malunò we døngkurì gø vbá we dang,vkvt dvpvng Shi lòng svng 2021 nøng 3 shvlá 31 høq Shaq rvmnø dvpvnglvm íwe svng shálún shìe.

Covid 19 Zønlì rvt dvshá vhømò we móngzøngcerìò mvdøng Vchvk lòng svng vkvt dø dvpvngshì rvt gvzà oqā wàwe dang, dvshà lv'm kèní lutshì lúnlvmrvt dvnúngà we dang, vkvt dø dvgø'ā wenø American døngku vsvngrì kaq svng ròqgar lòng íwe dāng, American døngku vsvngrì mvmè nø chøm vgun zv'ng mv-lunò høqshaq íe. Wervt àngmaq vl we chømrì svng gùrlvm høq dvdvmmò we døngku vsvngrì gø mvmè vl we dang, dvgøshì lvm chøm màdá Vsvng luqmvnshì lòng nìnø Covid rvt mvdò vrvmtaq téwa shvrē dvkéwe bù;nglvm vlsháòe wanø Gaichuk svrado Coakley taq kèní shønbøā we íe. Vkvt dø Covid 19 Zønlì yóga rvt bvnlì màdá vl we vsvngrì, gòng we Gvmsùng mv-luqri, vmlvm aqlvm yvklvm vhømò rì svng dvpvngshì lòng nø jøngjø'ng rà we vsvngrì kaq dvpvngshì lòng íwe dang Gaichuk svrado taq kèní mvsat bøā we íe.

Lvngdøm taq Gaichuk svrado kèní bøna:mi we rvtø vdòng yanbōng ngwi nvng singdø dvshārì, ròqgarshú màdárì kaq nònggwøn zì nø wàlvm dang, Toni Vsvng gø vrvmmō vlún vkvngrì íwe shiqshàn lvm dang nvng singdø lún vdù we Áháraq nvng vl-lvmchøm lúnlvm nø àngké Catholic Shvngømréò Vsvng mvdò vrvm nvng vtoq-vtip vzømvzvp lvm rvt shvngøt dvtú we dang íe, wanø dvtanò nø shøn bøā we íe.