England shvngømé svrado tiqgø Catholic shvngømré svng vposhì lvm dvgø shì we

England shvngømé svrado tiqgø Catholic shvngømré svng vposhì lvm dvgø shì we 

Àngnø Catholic shvngømré svng vposhì lvm dvgø shìwe svng shálún shìe.

Àng shønwe taq yadø Catholic shvngømré svng poshì lvm dvpat rvtø yanggúng lo:ngshøngnø vjúrøt shøngwe í dvdam rá:ngà. Yadø Catholic shvngømré kaq svng poshì lúnlvm nø ngà dvpat mvmeni yakwe bvnlì tiqlòng niíe.

England shvngømé taq nøngrì mvme Gvray bvnlì taq dvzaq dvkángshøng rá:ngà wenø Catholic shvngømré svng poshì lvm tvrà svng síngshá dèzvr ló:ngà we gø íe.
Àngò lvpat rvwè køp dángte nø gvray bvnlì vdòng taq dvzaq dvkángshì bø:ì we ínø we shvngømré taq dvzømshì bøì we shvrúng shú, svrado bvnlì døngjá rì svng gø oqà  wawe nvng we shvngømré svng gø yáng mvtàmvm we mø:í we svng vtànvtnà.

Àngnø svmarérì kaq svng shvrúng shú vya zílvmvwá shì we shvngømré lvp kaq svng tubùm dvzaqshì ráì wegø íe.

Mònggvn England shvngømé svrado rì àngké mvdò vgopè íwe Justin Welby shønwe taq "Svrado Jonathan svng gvzà oqà wàlvm vle, pàwálvm wani àngnø ya England shvngømé vdòng taq nøngrì mvme nøng gvray bvnlì taq dvzaqshì bøì wedøni àngò mèpvng lvpat rì taqgø zàn dvtut dvzaq shì laqlúnò vjú røtā we dang vtàn bøà. England shvngømé nø mònggvn taq Catholic nvng Orthodox shvngømré mèpvng nvmbat 3 vsvng gorø luq vtàng íwe shvngømré gø íe.

Svrado Jonathan nø England shvngømé kèní Catholic shvngømré svng poshì we nvmbat 2 gø wagø svrado pègø íráì. 2010 nøng taqgø svrado Rt. Rev. Andrew Burnham nø England shvngømé svrado bvnlì svng 10 høq dvzaq shì bøì mèpvng Catholic shvngømré svng poshì yàngì we íe.

19 àngyá mvzuq nøngrì vzàng kaqgø wedø England shvngømé svrado rì Catholic shvngømré svng poshì we gvzà vlyàngì we svnggø yánglún shìe. Wedø Catholic shvngømré svng poshì we svrado, shvrúng shú rì nø Catholic shvngømré vdòng taqgø nøt løm løm í dvzaq dvkángshì we svnggø yánglún shìe. Yadø svrado Jonathan gø  September 8 ni taqkèní nø dvráshvng àngò bvnlì taq kèní nvrshìnø Catholic shvngømré svng gongvm we írat àng svng tùbum dvbangā we shvngømré rì tiqgø vrvm svng gvzà oqà wawe svng vtàn vtnà we íe.