Gvmsùng svng wa shøn nø Shiqshan tvrà dāng, mà-shvyúm lvm Svrabyin Koqkvmí dvkvm we shvngkà

Shiqshandvp dvzømshúri nvng zā vsvngri dvhøø jà Gvmsùng bé lvm long svng wà sun nø lvjvngshì we taq Shaq mv-cvm lvm rvt Svrabyin Koqkvmí vlē v-mi we lvban búngwa ni (September 11 ) ni mvnggáng Ginsa vgvm we mvdò nvng vhøm we taq shøn bøā we íē.

Tiqdvl vsvng kaq mvrézā nø gunlvjvng we taq,zì Svra wun nvng wa mvcing shiqshandvp hang tiqlòng nvng cing we íē. Shiqshan lvm dāng Gvmsùng mà-vl long wa èshø nonø zā gø svng pàti mv-lvn weí mv-daq. Zā gø svng mvrézā nø vdèo tvmu bvnlì dø dvdut nø dvzøm lvm,zā gø svng gunlvjvng we taq zā yv'ng svng wà lvjvng we mø:í dø à:ngò nønt , laqyàri, pvlace kvmnønt tvràri svng gø dvda:ma nø lvjvng ràe.

pàwálvm wani zā vsvng gø vrv'm nø bashari íe.wervt kapà zì nø ràe,kadø aq ràe dvtú we wa møi dø,Zā vsvng tiqgø nø zā we íni gø shóngnønt ní shvlá wā mv-kok nø Svra wunriò nònggwøn zìkà,cìò nònggwøní téwa nøntshøm lúnò nø bān we íē. Svrabyin Koqkvmí nø vmyat lún lvm long mà-sunshì nø, cì lvjvng ra gø svng dvbvng we mvdòrì kaq shvgunò nø lvp bøā.Yóga gundvtøp we taq Gvmsùng rà we íe.

Iní gø yóga gundvtøp we nvng cì lvjvng we yà vní long svng vdù vbóngdø lvnglún lvm long svng vlømshønge wàe.Ya vnipvn taq zā vsvngri svng cì lvjvng we nø nvmlat taq gvlra long íē. We mvdvmø shiqshandvp dvzømshúrií dvgung vl dø zā vsvng kaq cì lvjvng lúnlvm gø vná mv-daq. Wervt ringdø møi nigø shvla a:tvngí dø dvgø'ā nø, rà we nònggwønri gø lv-lún bøò dø dvnung ràe. Mònggáng Ginsa vgámlvm mvdò svng nø (1985) nøng kèní pvng yànga.

dènøng àngmaqò lìpong svng Covid vnà Zønlì dvjvng rvt àng wà nøng dø dvkømshi nø lìpong svng wá mv-lunò we ini gø September (10-13) høq Online kèní dvkømshi nø wà bøā we svng Shà lún shìe.