Gvray kaq oqà wawe vmshvŕ bóy angni

Gvray kaq oqà wawe vmshvŕ bóy angni

Vmshvŕ bóy angni wa mvsat shì we November 26 ni nø American móngdàn ò Holiday rúng bikò we angni tiqni gø íe. We móngdàn taq yani svng 1621 nøng Colonists bat taq mvzi dvyørì gong ráì làngcha taq tvsvng tvlevm nø vmshvŕ bóy svng nvmlat wá pvngshì yàngì nø angyá mvzuq 2 mvzuq nøng rì høqshaq Colonists rì nvng móngwálrì taq wáshì yàngì.

Yalòng nø 1863 nøng móngdàn mvjàn bønwe rvwe rvm rvtø høqshaq wáshì ráì we ínø President Abraham Lincoln taq kèní yabóy svng nøng vrvm November shvlá taq wàlvm dvkám yàngà we íe. Oqà wa bóy tóng laqyà Nvmlat taq yabóy nø gvray kaq oqà wawe noqngøm tvrà nvng màbóng dø mvzi dvyørì tasvng tvle vmwe gø íyàngì.

Yabóy angni svng móng vsvngrì dvpat náni tiqni ku wáshì we íe. 20 angyá mvzuq nøng rvwe rvm tuq ráì dvgvp kèní nø gvray kaq oqà wawe vmshvŕ bóy ku wápvbgshì ráì nø nøng vrvm Turkey ca tiqgo mø:íni 2 go shvlàngò we laqyà svng wá pvngvtnà. We móng taq nvmlat vmshvŕ bóy wáshì yàngì we nø 1620 nøng Plymouth wamà kaq svng Mayflower watøò we shøí tuq ráì we English dvcìrì nvng Indians dvcìrì taqkèní wáshì yàngì.

Angmaqnø American móngdàn svng nvmlat vl ráì we English dvcìrì gø ínø we bóy gø nvmlat wáshì yàngì we vmshvŕ bóy íyàngì. 1620 nøng taq Plymouth svng tuqráì we Puritan dvcìrì nø tvnégø dat ráì. Angmaq taqkèní 2 wvĺ tiq wál dángté nø we nøng rvngtúng øni shì yàngì. Ngámshì we angmaq vsvngrì kaq American móng dvcì íwe Squanto tøshì we tiqgø taqkèní angmaq svng nga vkwivm we nvng lvgong kvtvm we dangrì shvngøtò weí angmaq lvpat rìsvng shvlutā yangà.

Squanto angnø Catholic shvngømré tiqpè ínø 1614 nøng taq Captain John Smith íshølò we English Party tiq mvdò í tvpmò nø Spain móngdàn svng vshuq wàlvm nvmvm yàngà we tiqpè íe. We móng tuqvmì mèpvng Dominican mvdò í ang svng chángò nø American móngdàn svng vrá vtang yàngà we íe. Squanto nø India nvng English kà tvleā shú tiqpè gø íyàngì.

Angnø Plymouth wamà taq vl we vsvngrì kaq tubum dvbangshì we tiqpè ínø Wampanoag dvcìrì dvgøng rìkaq kvtnvm tvmø rìnvng vm-aq lvm dangrì taq dvbangshì we tiqpè íyàngì. We rvtø kèní American móngdàn taqnø Gvray kaq oqà wawe vmshvŕ bóy svng wáshì pvng yàngà. Squanto nø 1622 nøng taq Indian dvcìrì taq kèní pvla zíò nø shat yàngà.

Yalòng Gvray kaq oqà wawe bóy nø America móng taq Catholic shvngømré íwe angmaq taqkèní nvmlat wá pvng yàngà we mvtaq nvmlat kámnøt tvrà taq shvnglut vkáng lúnò we gø íráì.