Gvray nvng Tonio gwørwang svng Shóngshi gø nø rvzvngceríò Lvpat taq nvmlat nvmpvng íe

"Gvray nvng Tonio gwørwang svng Shóngshi gø nø rvzvngceríò Lvpat taq nvmlat nvmpvng íe" 

Kangpè angnì ungelu vjúrøt rvtø vdòng Svrabyin Koqkvm Francisí dvzvr piter Noqngøm Wang taq kømngøm ráì we shvngømré rvzvngcerí svng " shú:ng nønt wàwe nø Vkangpè Yesuí shvngøt dvtú we nvmlat kàciq Híkvn íē wànø shønò e. Svrabyin Koqkvm Francisí nø lvban ni ungelu vjúrøt Kà shøn dangí weniò dvbushang Mongkà taq kèní Mongkà svra tiqpèí vkangpèā té vtvng Dvrá nø kàlù:ngí vtù mà?wà røtnò we kà vgo taq kèní vrāshi nø Pvlace nònggwøn zí we dāng Vkangpè Yesuí nø " Nàò Gvray kaq tiqlvpat èshóngshì, shánønt zit-nønt shvngbèí gø èshóngshì, nà nvng tiqdvr vsvng kaq svng gø èshong shì wanø vta:ngòē. Nvmlat nvmpvng Dvrá vní dāng, Svrabyin Koqkvm Francisí nø yalòng nvmlat dvkvmkà vní lòng svng lángò nø Vkangpè Yesuí nø kv'm we rvzvngcerí shvngbè dvpvt mà-vl mà-daq íwe dvkvmkà vní lòng svng gvl yàngà. Nvmlat (1) kà nø vchvnglaqya nvng kvmnønt tvrà lvpat nø nønt mvhøtlvmrì bù:ng rà dvgvp tønzā nønt í shvyūm mvlùnshì rà kvt shóngnønt wàwe nvmlat taq toni kèní vl-rà we dāng, Vní (2)Kà wakà nø shóngnønt nø Gvray nvng tiqtvl Vsvngrì vdòng vtoq-vtip vzømvzvp we dang,Mazat mà-røl dø, marvwing dø tiqnønt tiqmùng,tiqdø gār lún ràe wàe.

Svrabyin Koqkvm Francis shøn we taq " yalòng nø Vkangpè Yesuí shvngøt vjít dvtú we taq vpø vtvng tiqlòng ínø , tiqtvl vsvng kaq shóngnønt mà-dvtvn lòng nø Gvray kaq jøngjø'ng Shóngshi we mø-i we svng nøngmaqí singrà íe. We pàdø Gvray nvng màzøm we tiqgøò shóngnønt wàwe nø tiqtvl vsvng kaq shóngnønt mà-vl walòng svng nøngmaqí singrà íē. " Vkangpè Yesuí dvkvm we dvrá nvng Kà dvtutshúrìo Mòngkà shvngbè nø yalòng Dvrá Mongkà vní lòng mvdvmø mvdøng shvngøt dvtú dāng, Íwe svng shálún shìe. gvrayí nø angò vsvngrì svng zì we dvkvmkà rì shvngbè nø Gvray nvng tiqtvl vsvng kaq Shóngshi lvm , shóngnønt dvtanlvm dangri wà íe. Gvray kaq shóngshi we dang taq vjùrøt lvm, Vkangpè Yesuo kàgvp svng vpø shvring noqngøm lvm ,tiqtvl vsvng nvng tiqdø vtoq-vtip vzømvzvp lún lvm, vrvm vrá nø makok dvdí nønt, tiqtvl vsvng kaq Shóngshi nø dvpvng lvmrì vbá we íe.

"Vkangpè Yesuo shóngnønt àngké nø Gvray dvbushang Mongkà taq vbá dø àng tiqgong shvngbè vpnóng shìnø àng shóngnøntnì mvrà kèní nøngmaq èchvngbøshà, sherwe rvzvngce lvpat gáwe vdòng taq góng dèzvr bøshà. Wervt nøngmaq shvngbe nø vkangpè Yesuo gá we shóngnønt vdòng taq shóngnøntni vtoq-vtip vzømvzvp, vrvm vrá nø Gvrayò shóngnønt svng dvtvn weí shvtsè wà shì lvm gvzà Vchvk we íē.Vrv'm vrá lvm lòng nø nìvrvm røt shìrà we gønpaq tiqlòng gø íe. Svrabyin Koqkvm Francis í shønò we taq, Gvrayò mv-kok dvdí nønt nø nøngmaq svng nønt shvyūm lvm nønt mà-vl. Íwe Vkangpè Yesuo dvbushang dvrá svng rvtø vrv'm cvnshì nø gòe wàlong svng dvdam rønlvm dāng,dvshvt nø, dvshvng bøā we íe.