Gvray vdòng mà-vl bøì we Svrabin Koqkvm rìò dvgvmri kaq svng svrabín koqkvmpè Francis nø November (2) nī taq dì nø vpø shvring weí vjúrøt dvbvng bøā.

Gvray vdòng mà-vl bøì we Svrabin Koqkvm rìò dvgvmri kaq svng svrabín koqkvmpè Francis nø November (2) nī taq dì nø vpø shvring weí vjúrøt dvbvng bøā.

  Mà-vl bøì rì dvpvt vjúrøt dvbvng we àngnī November shvlá 2 nī taq Svrabin Koqkvm Francis nø St.Piter Baziliga zongme ò rvgaq vdòng taqø kø'm yangà mà-vl bøì we Svrabin Koqkvm rìò dvgvmri kaq svng dì nø vpø shvring weí vjúrøt dvbvng bøā. Roma myoq shvnvng yv'ngø cil dvgvm kaq svng gø dì bøì mèpvng lo lú:ng ì dvgvp vjúrøt dvbvng bøā we íē. Svrabin Koqkvm rìò dvgvmri nø Vkangpè Yesuò dvzvr (12) pè wa pè taq tiqpè íwe dvzvr Piter ò dvgvm shvnvng yv'ngø køm nø rvdā yangà. Shànshér pe wanø kà dvkvng bøā we mà-vl bøì we Svrabin Koqkvm tiqmaqò dvgvm tiqmaq nø St. Pieter Baziliga zongme ò mvdvm dvtá:ng kaq vsé bøā we íē.

   All Souls' day nø Catholic Sasvna me dvpvt Shi bøì rì dvpvt mvdøng vjúrøt we àngnī tiqni gø ínø Vatican taqkèní dè nøng nø pvlenāyì ingencial svng zí bøā we íē. Yalòng pvlenāyì ingencial svng dènøng taq tiqnvmshá ku November tiq shvlá tø:p vdòng kanī taq íni gø vjúrøt dvbvng we í dvgøng shvmvn Kà røtshì gø i vtoshì lúnlvm ídaqē.

   Nøng vrvm Svrabin ínø Gvray vdòngø mà-vl bøì rì dvpvt vjúrøt we àngnī svng Roma myoq taqø vl we dvgvm me tiqlòng lòng yv'ng mø-í nìnø gwà we shvrà tiqyv'ng yv'ngø Shi bøì rìò pvlàcè rì dvpvt Missa Kagvp nóngà weí dè nøng nø byindit dvgvm yv'ngø Missa nóngà nø vjúrøt dvbvng we wà bøā we íē.