"Hí wūr zeng mv-wà we cvmré (2) gø'ò angpè angmè ni, Svrabin Koqkvmpè Francisí phone gō kà rvt dā we dang"

"Hí wūr zeng mv-wà we cvmré (2) gø'ò angpè angmè ni, Svrabin Koqkvmpè Francisí phone gō kà rvt dā we dang"

Caterina nvng Bruno døngku angni ínø  Svrabin Koqkvm kaq svng Kàru tiqkùm shvri bøā nø January shvlá 23 ni lvban vshøm nī dørøm 5 nāyi dvgvp phone gòng lúngì nø " hello ngà nø svrabín koqkvmpè ø:ngàe" wā shøn lúngì kvt angmè taqkèní" Ā:ngàe Gvray e " wv'ngnø dā taqsórì a:tv'nshøngè wanø shøne.

Svrabin Koqkvmí Caterina kaq" mè-dāni, ngà nø jøngjø'ng ni Svrabin Koqkvmpè" ø:ngàe wā zvndvttut kà shøn bøì. Àngmaq døngku tvrà rì svrabín koqkvm kaq svng rvtø àng dòngce taq Kàru tiqkùm shvri bøā lòng rvt jøngjø'ng bønlún we dang svng Caterina taqkèní dvdvm lúngà nø àng døngku pè Bruno nvng tiqdø Giorgia nvng Marcel wàwe hí wūr zeng mv-wà we cvmré vní gø dvkùmò gø'ni íwe dang, vlē a:mì we rvtø àngni taq ramnvngrì tiqmaq nvng Svrabin Koqkvm vhøm bøì  yv'ngkèní shá dvzvr we taq Caterina nvng Bruno maq nø àngmaqò døngku tvrà svng Svrabin Koqkvm kaq Kàru tiqkùm vrū nø shvrilvm rvt paqzí dvkøm zi rvt vrùshì bøì we íe wàe.

Svrabín Koqkvm Francis nø àngí dvkùmò we cvmré (26) nøng íwe Marcelò nønt yóga tvrà dang svng røt bøā.Angelus vjúrøt Kà shøn we svrabín koqkvm Francis kaq svng dvjàqò nø yv'ng we hí wūr zeng mv-wà we Giorgia nvng Marcel maqò sømla tiqlòng svng Caterina ínø shø:pmò we dang

Svrabín Koqkvmí nø àngmaq kaq svng jøngjø'ng gōlvm rvt mà-dvdàmò we dang àngmaqò angri angrvprì taqkèní tiq dvtáng Kàru shvri bøā nø rvtø àng nøng vlé ráì mèpvng svrabín koqkvmí gō we dang ínø gvzà dvbù nøntshøm we dang Svrabín Koqkvm nvng Kà v-toq v-tip dvmàn we dang taq gø  rvmnang nvng kà dvmàn pàdø íe, wàe.

Caterina nvng Bruno døngku nø 2003 nøng kèní shø'qò jvng gwùr vhømò we cvmré gunicè rvtø mà-høm rì kaq svng vtōlvm, døngku vsvngrì taqkèní gø dvgø'shì lvm rvt "Take Me Home" project svng nvmlat pvngshì rì gø ínø Caterina nø shølshú mvdo taq vbá we tiqgø'gø íe. 

" Vkvt dø Cvmrérì kaq tùbùm nø yv'ng dvbvngshi bøì rvt gø gvzà oqā íe." wanø Svrabiní wē mè kaq svng phone taqkèní v-toq v-tip dvmàn weí mvsat bøā wanø gø shønòe.