Halloween mvdò dvcaq bøn we mvdvm Korea Gaíchuk Svradopè í nøntshvløm kàru dvkangò we 

Halloween mvdò dvcaq bøn we mvdvm Korea Gaíchuk Svradopè í nøntshvløm kàru dvkangò we

‘Halloween’ yaq shvngwi shvbyó we bóy yv'ng Tìnī Korea móngdàn taq shvngwi shvbyo we bóy wàò ke lúm ráì we vsvngrì vshat yv'ngkèní Vsvng mvmè shì bø'ì høq íbøì rvt Korea móngdàn, Seoul Gaíchuk Sasvnaò Catholic Svrado pè Peter Chung Soon-taick í lvpat cømà:mì rì dvpvt nønt yòr we dang nvng ngvmshi we chøm vsvngrì dvpvt vjúrøt dvbvng we dang kàru taqkèní shvrì bø'à we íe.

Seoul Gaíchuk Svradopèò Mongkà taq mà-vl bø'ì rì dvpvt nønt yòr nønt dvshà vhø'mō rì shvngbe mvdvm Gvray yv'ngkèní nønt shvløm we vtōshì laq lúnò wā shvmán we dang, yalòng banchvt svng pvrànà we vsuyaq rì, Chutchvng we taq lúm we gø' vrvm gø Pàmvràce ílvm, yadø íwe banchvt shiwvt rì mèpvng mà- høm lvm rvt gø vjúrøt dèbvng bø'à we íe. Banchvt bøná:mì mèpvng nī taq shvngømré mvdò (7) lòng taqkèní shølshú vgorì banchvt bøná:mì we shvra rì kaq dì nø yàng bøā. Wè banchvt lòng nø Vsvng loksok vshat yv'ngkèní Vsvng mvmèshì mv-bønrì yv'ngkèní móngdànò mvshøl taq té vtv'ng mv-bøn tiqlòng íe, wàe.

Wè banchvt bøná:mì we taq Vsvng shvngbe (150) jvn lvpat cø'má:mì nø, (80) jvn dv'ngte dà:má lún bø'à.Lvban nī vyáng rvwe rvtø Angel Lu vjúrøt rvtø taq Svrabín Koqkvmpè í " wè nī taq lvpat cø'má:mì rì Seoul myoq yv'ng bøná:mì gvzà nønt dvshà lvm banchvt rì dvpvt shì yv'ngkèní zúnà:mi Vkangpè wur kaq àngmaq dvpvt vjúrøt dvbvngì" wā dvkvm bø'ì.Wè banchvt lòng nø kayv'ng kèní bøn lúngì we dang chvk mvsháshì we dang, dvn a:tø'ng we kvnmaq vdòng kaq mèpvng lvp kèní rvpaqshì ráì we Vsvng mvdò rì taqkèní bøn lúngì we íe, wànø dvtøp lúnòe.Tìnī Korea móngdàn dvmmvdaq  ígø vkvtdø íwe banchvt rì mèpvng laq mv-bøn daq wā shøn nø, tiqlvban vdòng nønt yòr rà kū dvshvng bø'à.

Tìnī Korea móngdàn Catholic Svrado àngké mvdòò dvkvng kàru taq " Tìnī Korea móngdàn nø mà-shvla lòng nvng àngdeò døngjá svng màtōshì lòng svng cat ràe. Pàwálvm wàni wè mà-shvla we laqyarì ínø Vsvng mvngpong mvdvmø mà-shvla we laqya mvgvm vcaq dvzvròe. Vkvtdø wà lvm nø nøngmaqò bvnlì rì mvdvm kashvdik døng lúnlvm ra we dang vmìng vkang vl rì taqkèní bøná:mì we tvrà svng tøpni tøpràng gundvtøp nø mvrà zí vdùe, mèpvng yadø íwe banchvt mà dvbung lvm rvt dvkv'm kà rì wá vdù we dang, téwa nø shòlaq gūchangrérì ,zilàngrérìò lvpat mvzø'mlvm, Vsvng lvpat nvng àng dvgung nø gvzà ring we pøhà:pm íwe dang, Vsvng lvpat nø kapà ígø dvle mv-lúnshì we vpø vtv'ng íwe dang dvkvng kàru dvkvngò nø dvshvng bø'à.

Lèqlāyé dì we tì shøchøm vløpbø'ì rvt nønt yòr lvm bønbúng bø'ì mèpvng vkvtdø mvdò dvcaq bøn yv'ngkèní Vsvng loksok vshat nø Vsvng mvmè shì bø'ì we mv-bøn Tìnī Korea móngdàn mvshøl taq laqni mà-shvlá vtv'ng íbøì. Wè nønt yòr kung taq vsvng shvngbe (304) gø' lvpat cø'má:mì nø tékà nø zongmangèrì íe. Wè lòng banchvt rvt vtì tvrà dang nvng singdø bvnlì Dvrá rì svng gø shvjvk lúngà, wàe.