Hong Kong Cardinal pè Hong Kong dvrá róng svng tuq ráì we

Hong Kong Cardinal pè Hong Kong dvrá róng svng tuq ráì we

Hong Kong svrado Joseph nø àngkaq svng dvrà ò we vmuq svng shvtà lvm dvpat Hong Kong dvrá róng svng 24 ni taq tuq ráì wegø íe. May shvlá 24 ninø mìwà móng taq vlwe Catholic shvngømré rì dvpat vjúrøtā we àngni gø íe. Vsvk 90 nøng íbøì we Cardinal pè mvng tiqdø dvgá svrado rì 4 gø nø dvrá róng svng tuq ráì wegø íe.

Àngmaq nø 612 vmuq nvng singnø mvrà vlé shì we íe wanø na kéò wegø íe. We ciq nø svngpvn dvcì rì dvhø Democracy tvrà taq dvzaq shìwe vsvngrì kaq tubùm dvbangā we mvrà íwe svng shálún shìe. 

Agence France-Presse (AFP) shvngka dvp kèní shálún shìwe taq we vmuq taq na kéò we vsvng 5 gø àngmaq taq mvràvbl we dang vtàn bøà wegø íe. Pàwálvm wani svngpvn dvsháza bvnlì sing we yalòng vmuq nø mvrà møí we dang vtàn bøà. La ya vmuq lòngnø mvrà la íwe ínìnø Dollar 1274 dolla washì ràwe íe.

Cardinal nø nø tuqrawe September 19 ni taq vrá tiqkvt dvrá róng svng dvrá shvtà lvm dvpat tuqrawe gø íe. Dvrá róng kaq svng vicar general Fr. Joseph Chan tuqráì we ínìgø Nøng vrvm May shvla 24 ni svng Mònggvn vsvngrì shvngbe ò vjú røt shì ràwe àngni wanø Svrabín koqkámpè Benedict (16) í 2007 nøng taq vrìng yv:ngà we íe.

We Powerball àngni taqni Cardinal Joseph taqkèní Mìwà móng dvpat missa vjúrøt dvbangā lvm dvgø bøà we íe. Italy, Bintit, Germany Sweden nvng dvgá móngdànrì taqkèní krønmvn gvsarì gø we dvrá róng svng Cardinal ò dang svng tá lvm dvpat tuq ráì wegø íe.Cardinal svng May shvla 11 ni taq tvp ké bøà we ínø lutshì ráì wegø íe.

Wedø lutshì ráì we vsvngrì taq Europe móngdàn rì yvngkèní krønmvn gvsarì gø weyvngø vbá we íe.Vatican American móngdàn kèní kàshønā lvm vko vkáng riwe tiqgø taq kèní gø Cardinal ò dvrá dang nvng singnø tøp tøp wa gùn dvtøpā we dang vtàn vtnà we íe.

Mìwà móng nvng Hong Kong móngrì ò vsúuaq vgorì taqkèní Democracy øpkáng tvrà svng shóngshì nø vtoshì we móng vsvngrì kaq shvnip shvnvr we dang mvwà lvm American móngdàn Gàmzø róng kèní bvnlì àngkàng tiqgø íwe Karine Jean-Pierre í vtànvt nà we íe. England móng Parliament yvngkèní gø Cardinal svng yadø tvpmò we nø gvzàni dvgùng yømwe bvnlì íe wanø dvkám bøà we íe.

Svrabín koqkámpè Francis taq kèní gø lvbán ni vjú røt lìpùngmè dáng bøà mèpvng wedø móng lvmvng rì dvhø shokwe Mìwà móngò tvrà svng dvdamnø gùn fvtøpmò we dang May 22 ni taq vtàn bøà. Svrabín koqkámpè Francis taq kèní yadø bønwe Mìwà móngò móng lvmangrì nvng Cardinal pèò tvrà dvpat vjúrøt dvbangā lvm vtànvt nà wegø íe.