India móngdàn Catholic shòlaqré rìnø Christmas bóy nila vdòng rvmnvng tiqgø svng sh:vm sh:vq we bvnlì wàò we.

India móngdàn Catholic shòlaqré rìnø Christmas bóy nila vdòng rvmnvng tiqgø svng sh:vm sh:vq we bvnlì wàò we.
            
  India móngdàn Catholic shòlaqré rìnø yanøng Christmas bóy mè svng vtoshì we ku àng lvjøm zøng we rvmnvng tiqgø svng sh:vm sh:vq we èwàò wanø vrìngwe bvnlì wá pvng bøà we íe. Pàwálvm wani Christmas bóy mè nø byo bóy tiqlòng dvpat wa wáshì lvm mø:í.
 
   Mèpvng pvlàcè lvpat svng dèni lvpat taq vrá dvtøp shìlvm rvtø lvngcha gø íe. Kàngpè Gvray nø lòngzàpè svng mònggvn vsvngrì kaq mvrà kèní chutcháng lvm dvpat dvzvŕ yà:ngà we svng dvdamì nø gømpaqrì tvle kéì we nvng tvsvng mvrà chutā kéì we bvnlì svng wáshàì.
 
  Shòlaqrérì taqkèní Christmas lvngcha taq tiq nvmshá íwe vsvngrì kaq tubùm dvbangā we bvnlì svng wáshóngshì wegø íe. Tiqdang kèní wani Christmas ò byowe tvrà svng àngdè nvng tvpníshì we àngnvm àngchvngrì nvng tiqdø mvngushì nø vbá lúnlvm lvjøm svng dvtú wegø íe.

  Yà shòlaqré àng mvdò nø India móngdàn svrado àngké mvdòò dvtú we vdòng yaq bvnlì wawe tiqmvdò gø íe. India móngdàn nø vle vmì we 60 nøng dvgvp kèní svngpvn vko vkángrì vlíng vpo dvzvŕ we dang taq shvlawe dangrì gvzàni dvtanā lúnwe tiq móngdàn íwe svnggø yánglún shìe. Ínìgø wulaq bvnlìrì pø gvsùngrì dang taqnø rìn vrá vjú lúnwe dang shì mvvlwe ratnø mònggvn taq té vtang móngdàn rì shipvn taq vbá we ínìgø dvshà vsvngrì luq vtang móngdàn shipvn taqgø vbá we svnggø yánglún shìe.

  India móngdàn taq 2021 nøng vdòng Global Hunger Index (GHI)’ í gùn dvtøpwe shipvn taq mònggvn móngdànrì mvzángí mvluqpøn kéò we móngdànrì 116 móngdàn kèní nvbat 94 taq vbáe wanø tvnùng ò we íe.
 
   Yadø wáshì weò àng mvtú nø rà vchyak we vsvngrì kaq tubùm dvbangā we, wedø dvsháza shóngnøt bvnlì laqyà zángshì lúnlvm nvng yanøng vdòng taq jøng jøngni yaknø rà vchyak we vsvngrì gorø 1000 gø svng sh:vm sh:vq nø tubùm dvbangā lvm íwe svng dvtú vtnà. Delhi taq vlwe shòlaqré mvdò nø Bethania zùng yáng kèní pvnshì ráì wegø íe wanø we mvdò ò bvnlì àngkàngpè Anthony Judy í dvtú bøà we íe.