India móngdàn yvngkèní Franciscan Sister rì taqkèní dvshà vsvngrì kaq (ဆိုက်ကား) gàrì dvbangā we.

India móngdàn yvngkèní Franciscan Sister rì taqkèní dvshà vsvngrì kaq (ဆိုက်ကား) gàrì dvbangā we.

     India móngdàn Galagada wamà taq vlwe Franciscan Catholic Sisters rì taqkèní dvshá mvhoq vsvngrì kaq (ဆိုက်ကား) gàrì ( chyàng dvbangā bøà we íe. Yalòng Ālu svng April 2 ni taq we Sister rì ò zùng kèní dvbangā we íe wanø shálún shìe.

   We Sister zùng øp Sister Josephine Melkiasshønwe taq yadø dvshà we chømgùng vsvngrì, shvng Gvmsùng mvvl we vsvngrì kaq yadø dvbangā lún bøì rat gvzà nøtshøm lvm vle. Yadø zàn dvtut dvbangā lúnlvm dvpat gø sister zùng kèní dvzaqshì mvbat ínø yalòng nø nvmlat boq dvshà we chømgùng 8 chøm svng dvbangā lún bøì we gø íe.

    Avila wamà, St. Tresa gørwang shvrúng shú pè George Antony shønwe taq kèní yalòng tvyø lvmàng svng vjúrøt shvmvnā bøà we gø íe. Àng taqkèní mèpvng kaq pø Gvmsùng rì náng vshø:pmìnø mvzán pørì kaq dvsháza tubùm dvbangā we bvnlì rì taq dvzøm shìlvm nvngòn ziwe íe.

    Franciscan Sister mvdò nø Catholic sasvna tiq mvdò ínø Mary of the passion taqkèní poqpvng yà:ngà we íe. We mvdò svng poqpvng ráà we shvrúng shú pè nø 1839 nø taq shøq yà:ngà nø 1907 nøng taq lvpat bé yà:ngì. Àngnø British-Indian dvcì tiqgø gø íyàngì. We mvdò svng 1877 nøng taq poqpvng yà:ngà nø vsvng dvcì rì 78 dvcì nvng mònggvn móngdàn 77 móng kèní dvkøm shì we íe. India móngdàn taq gø Galagada, Deli móng, móngwvl 11 wvl høq shaq vbá we íe.

  Svmaré rì dvpat kàru zùng svng nø 1947 nøng taq poqpvng lún yà:ngà. Yalòng nø Hindu dvcì cèrì dvpat vrangā ráà we gø íe. Yalòng wáshì ráì we àng manggá nø àngpè, àngmè maq vyvng bvnlì wa we rvtø cvmré rì kaq vcùngā lvm dvpat wanø mànggá kèní pvngshì ráì we gø íe.

   Zùng yalòng svng 1994 nø kèní rvwe zìdang zùngku tiq dvtang poqā lún bøà we gø íe. We zùng taq rung we zùngmang cèrì nø dvshà vsvngrì ínø vzàng kaq Hindu dvcì kaí shvng:øtnò we íyvng kèní vkvtnø English dvcì kàku shvngøt ráà we gø íe.

  We zùng ò àng tvnù mànggá nø svmaré rì dvpat dang vrvm taq zìdang dvhángā lúnlvm dvpat íe. We Sister zùng taqkèní lvpat zìdang nvng vdu vbóng dø paqzí rì svng shvngøt dvtúā we gø íe.