International day of peace (Mònggvn sømsaq mòngzøl angni)

International day of peace (Mònggvn sømsaq mòngzøl angni)

       Mòngzøl lvm dang svng nø móngdàn vrvm rìò tvnù mangá, móng lvma wawe rìò bvnlì døngjá nvng shvngømré vrvmrìò shvrúng we taq kèní vjú røt dvzaqshì we mangá tiq lòng íe. Peace wawe mòngzøl lòng nø vsvngrìò shvwi, jór nvngòn, shvnip shvnarwe rì nvng vzivrùng wawerì taq kèní jór nø lúnshì ràwe zømvm we angshí angwvt tiq lòng íe wanø shøn lún shìe. Yani svng 1981 nø mònggvn rapdoq UN zupùng taqkèní mònggvn cømsaq mòngzøl angni wanø mvsat bøa we íe. Dèni September 21 ni taq wá vduwe yaniò tvnù mangá nø mònggvn móngdànrì vrvm taq mòngzøl we dang nvng sing nø tùbum dvbang dvzaqshì lvm dvpat íe. Yani svng wápvng bøà we 20 nøng naq bøì mèpvng 2001 nøng taq nø yani bóy svng nøng vrvm September 21 ni taq walvm dvkám bøà we íe. 2002 nøng September 21 ni taq nø mònggvn svngpvn dvcìrì dvhø mòngzøl lvm dang svng téwa dvhàngnø roqgvr lvm nvng weni vdòng 24 nari nø mvjàn gvsat werì mvwà lvm nøt vrá shaq íbøì we íe. Mòngzøl lòng svng nø washì shvlae. Darì vsvngrì mvdàm dèni bat vsvngrì nø téwa mòngzøl lòng nvng vrám vráwe tvrà svng tóng lún lú:ngà we íe.

    Mònggvn rapdoq UN svng poqpvng bøà mèpvng taqkèní nø móngdàn vsúyaqrì svng shvnip shvnarwe bvnlì rì mvwàlvm nvng vdè móng vdè rvgaq svng roqgvr we bvnlì rìwa walvm dvkám bøà we íe. Mònggvn taq mòngzøl lòng lúnlvm nø téwa vchyak á:mì. Dènila mòngzøl lvm dang taq dvzømshì vsvngrì nvng mòngzøl we tvrà svng roqgvr shìrìò bvnlìrì svng gø vrvm taq kèní gø téwa dvzømshì lúnlvm dvdamshì ràwe íe. Dènila yadø Covid 19 yóga zønlì vkøn we rvtø yadø íwe shvngkà nø vrìnglvm angwà mvdàm téwa vchyak á:mì. Yadø vna zønlì mvrùmè møt we rvtø taq tasvng vsarì we ínì gø yalòng svng tiqnø tiqmòng wáshàì we taqkèní mv-ngan lúnlvm dvzaq shàì wanø vrìng-vtnìe. Dènø taq wá vdu ráìwe dèni mònggvn mòngzøl angniò mvngánø mòngzøl dang svng tiqrá wá dvzaq shàì wawe íe.

      Yadø íwe rvtø taq tasvng vzìngì we shvngvr kéì we rì mvwá shàì nø dvsházàwe shóngnøtrì taqkèní mònggvn rvpdoq UN nvng vzømìnø dvzaq shàì. Mòngzøl lòng wawe nø shvnip shvnarwe mvlwe mvjànrì zømvm nø vsvng shvngbe nø mòngzøl we vdòng taq vzøm vzap lúnì we svng shøn mvyø we íe. Kadø ínìgø mòngzøl lòng lún lvm dvpat nø tiq rvgaq nvng tiq rvgaq gvsat kewe mv-vl lvm nøt vrá latmat túshì we vl-ràe. Gvray dvbùshvng mòngkà taq Gvray kaq èkám nøng ang taqkèní jøng jøng ni mòngzøl lòng èlún lóng nønge wanø vl we íe. Svrabín koqkámpè Francis taq kèní gø mòngzøl lòngnø nøngmaq shvngbeò shøngran íe, welòng taq tasvng vhøm mvngu shàì weí vrvm vráì we tvrà svng dì lvm wáshàì wanø tvnùngvtnà. Welòng svng síngrál lvm angboq boq dvkám bøà we íe. Wedø íratnø mònggvn mòngzøl lvm dvpat vzø:mì. Nà tiqgø taqkèní mòngzøl tvrà svng èwàò weí mònggvn nvng mòngzøl lvm nàí èlún lú:ngòe.