Laudato Si svng vtoò tubòm we kūí shøng kvtnò we svng Myikyina Svsana shvngømré taq kèní wà bøà we shvngkà.

Laudato Si svng vtoò tubòm we kūí shøng kvtnò we svng Myikyina Svsana shvngømré taq kèní wà bøà we shvngkà.

Mònggàn rvgvq yachvng vnvp lvm dvpvt Svrabín koqkám pè Francisí dvtvn lega íwe Laudato Si svng vtoò nø dvbù shòshòwa shøngkvt pv:ngò we svng Myitkyina Svrado gwrwang

taq vlwe shvngøré rìí kvt pvng bøà we íe.

2021 nøng June shvlá 12 nì lvban 6 yaq taq Myitkyina svrado gwrwang Aung Myin Thar mvring shvngømré vsvngrìò súnwáng taq rvtø yvng we shøng pvn (Man Jan Charle) wawe

shøngbvncè ( 11000) tøngsvng kvt pvng bøà we íe. Vzang dvtut mvsvla shøngtøngcè ( 1000) tøng svng gø kvtrvm bøà we íe.

Yã súnwang nø ( Ekaq) 80 dángtè vlwe ínø Svràdò Daw Tang í, dvtvn weí, we súnwáng taq Aung Myin Thar mvring vsvng (37) chøm nvng PLN pin yvl shì camp kèní (20) chøm rìsvng

vní nøng rvmá tvmū wa shìlvm shvngømré taq kèní dvzvrò we íe.

Mèpvng tuqra we rvtø taq gø shøng shvlá rì nvng nvmsì nvmsò tøngrì kvtnò nø nvlshì lvm shvrà chøm rì, shvngømré nvng singwe svng rì gø wàlvm dvpvt íe, wanø Myitkyina gwrwang

bvnlì ngakàng pè Fr. Dr.Joseph GawLu Yung Wa í, shøn bøà we íe. Fr. Dr. Joseph GawLu Yung Wa í, shønò we taq - Nøngmaqò Mònggàn rvgvq nø shøng wàò nø lūò rvt béá:mì, Jà dùò,

Lùng síng dùò nø rvgvq rì shángbè tìn á:mì we íe. Jà dùò rì, Jà dù dá:ngí, shøng ékàt nøng. Lùngsíng èdù nøng rì Lùng síng dú dá:ngí, shøng ékvt nøng, shøng wàò rì shøng wá dá:ngí,

vrá shøng èkvt nøng wanø dvshvt we bøà we íe.

Nøngmaq kachin móng wvr rvgvq svng vzàng taq mvdvm mvshøng nø vnvp lvm svng nøngmaqò wvr taq vhvp we íe. Kachin wònbòng rvgvq svng roqgvr lvm, shvngømré svng roqgvr lvm

waì wanø, RVA nvng (Interviewò) røt vtv'n kà shøng we taq shvkgkà tashìnøng we rìsvng nvngùn zìkà dvshvt we íe.

Wenì taq shøng kvtnò we svng Svrado gvbà Francis Daw Tangí dvtvn we nvng Svrado gwrwang angké rúng shølshú Fr. Dr. Joseph Gaw Lu Yung Wa, Svrado gwrwang gùntíng shøp shú,

Fr. Robert Hpau Yam La Wawm, Svrado gwrwang angké rúng rvgvq roqgvr we komiti rìí shølò nø Fr. MaMa, Svrà/mè rì, Tangpre Jau gwrwang, Alam Bum Jau gwrwang, PLN Jau

gwrwang, Shatapru Jau gwrwang taq vlwe shvngømré vsvng rì, Myitkyina karuna rúng taq kèní wòntán rì (60) ján nvng shvngømré vsvng shángbe ( 300 ) ján dvngtè tuq we svng

shálún shìwe íe.

By Paul Hpu Ye Dwe

RVA Rawang Rúng

Putao gwrwang.