Mìwà móng taq Catholic shvngømrérì ò svrado vya dangò we nvng Vatican àngké róng

Mìwà taq Catholic shvngømrérì ò svrado vya dangò we dang nvng sing nø mìwà móngdàn Bijin myoq taq vle vmì we 2018 nøng September 22 ni taq mìwà vsúyaq nvng Vatican àngké róng rì dvhø nøt vrá lèqmàt tú shì bøì we ínø ya nøng October shvlá 22 ni taq nø 2 nøng vhøm ráì we gø íe. Welòng nøt vrá kàru taq 2 nøng mvsatshì shaq ínø vle vmì lvbán vdòng taq Vatican àngké róng ò bvnlì angkàng tiqpè íwe Cardinal Pietro Parolin welòng nøt vrá rvtø svng dvtut shvyang lúnlvm, móngdàn vsvngrì nvng shvla dø vzøm weí shvngømrérì vdòng vjú vl we dangrì zvn dvtut wáshì lúnlvm vtànnò nø dvkám bøà we íe.

Mìwà vsúyaq nvng Vatican àngké gomidirì mvngushì nø nøt vrá bøì we lòng svng 2018 September 22 ni taq nvmlat boq we nøt vrá kàru lòng dvkang shì bøì we íe. We kàru taq mìwà vsúyaq nvng Catholic shvngømré vgorì dvhø shvng shvng wa vtoq vtip we dang rì vbá we gø íe.

Nøt vrá kàru taq mvdøng nø svrado vya dangshì we dangrì vbá we ínø Svràbín koqkám róng nvng mònggvn móngdàn vrvm taq vlwe svrado rì tasvng shvngømré bvnlì nvng sing we dang vzøm vzap shì lúnlvm dvpat íe.

Nøt vrá kàruò tvnùng mvnggárì taq mìwà móng vdòng taq vlwe dvzvŕ Peterò bvnlì døngjá tvleshì we svradorì nvng Svrabín koqkámpè dvhø mòngzøl dø vzøm vzap lúnlvm nvng vle vmì we angcé mvzuq nøng rìtaq shvngømrérì kaq shvnip shvnarwe dø íwe tvràrì dvtut mv vl lvm kàciqrì vbá we íe.

Yamóngdàn vdòng taq vl we Catholic shvngømré rìò mvshøl taq mvyøní kámnøt tvrà wawe rvgaq vdòng shvngømré wanø bøng zíshì høq shaq íráì.

Mvdøng nø vsúyaqò móng lvmang nvng kámnø tvràrì taq vréshì we shvnip shvnarwe mv vl lvm, móngdàn ópkángwe vsúyaqò vmíng vkáng vdòng taq shvngømré bvnlì rì wáshì ràwe dø møí lvm vràshì we íe. Yalòng nøt vrá kàru svng bønlún lvm dvpat Gvray jejú vdòng taq wa wálún bøì we íe, yadø írà kat wa móngdàn vdòng dvbùshvng bvnlì rìsvng mòngzøl dø dvshvng lún lvm tùbum shìnø móngdàn vdòng vl we shvngømrérì dvhø gø vzøm nø tiqnøt tiq mvyùng wáshì nø vl lún lvm dvpat dvdam shìwe mvnggá íe.

Nvmlat tiq boqò Vatican zùpùng mèpvng ban taq nø Bejín myoqò vsúyaqrì vmíng vkáng vdòng taq wa svrado vya svng kámshìshvla we gø íe.

Yadø shvla we lvpsvng vlíng vpo ráì we vtoq vtip tvrà nø yani la vkøn ráì we yóga zønlì rvtnø vsar mvnshì ráì we ínì gø téwa rvtø yanggúng zvn dvtøt wáshì lúnlvm vtànvtnà we íe.

Add new comment

4 + 10 =