Mídat tiqgø kèní kahtolic shvrúngshú jaò tiqgø íràì we shvngka.

Mídat tiqgø kèní kahtolic shvrúngshú jaò tiqgø íràì we shvngka.

A:ngò bøng nø Tom Colucci wanø tø' shìe. Angnø (2001) nøng sep (11) nì høq mídat mvdòò vsvng tiqgø íe. Wedø ínìgø (2001, 9, 11) nì kèní nø

ang lvpvt vlí:ngá mìnø tiqciq lvpvt shvrúngshú jvò lè íá:mì we íe. We nìnø American móngdàn vsvng rì dvpvt vná mvlún shìnø mvshøl vlwe

angnì gø íá:mì we íe.

2001-9-11 nì høq ang nø Newyorkò mídat tànaqò tanaq mú íwe íe. Wenì taq Tite tiqchøm svmìí vkvt nø Titechøm vsvt daq weí mídaq rvmnvng rì

angpóng shìwe svng yvng bøà we íe. Vsvng nøt mvzvng we vsvng mvgám vsvng shvt we rìí bùm dvpoq bøà rvt mídat vsvng angpóng shìvpmì we

svng yv:ngò we íe. Mídat rìò pvlacè shølshú Fr. Mychal Judge gø mídat rìò lvngdøm Scrament jèjú svng zíò taq sórí ang svng gø svmìí vkvt nø shì

bøì we svng a:ngí yvng bøà we íe.

Weni (2001-9-11) ni taq bøn we svng yvng we nì taq a:ngí dvdvm lún bøà wenø "Gvray nø kayvng vl bøìwe ímá” wanø dvdvm bøì we íe. We rvtø

taq lvngàré, Svmàré, cvmrérì nvng dvshá dvré vhømò we vsvng rìsvng dvzøm dvbv:ngò we yáng svng dvzaq shì bøì we íe. "Pàrvt ímá wanìnø angmaq

nø Kàngpè Yesuò góngsha íe. Angmaw zawe, angmaqí vhømò we rìsvng nøngmaqí gø vhøm shìwe dø nøtza rvt íe. Wervt Gvray Gvsvng nø dvgá kayvng

gø mvdì. Gvray Gvsvng nø yàyvng nøngmaq nvng tiqdø vlì we íe” wanø shøn bøà we íe.

Wenì taq yv:ngò vhømò we yáng kèní dvdvm lún bøà rvt angnø Katholic shvngømré shvrúngshúpè Fr. tiqgø wá shìlvm nøtrvt shì bøì we íe. Wenì

(2001-9-11) nìnø American móngdàn vdùng taq wa mví, mònggvn vrvm taq svre dvké dø wà bøà we Twin Towers (Newyork wamà vdùng wurlaq

mvdòò) Tite chøm svng vján pet we vsvng mvdò rìò nvmbøng shø taq kèní bòmí wapò we svng vhøm bøà we íe. Wenì (2001-9-11) nìnø vkvt nø

(10) nøng vhøm bøà we íe. We (10) nøng vlé ámì rvtø taq bøn we shvngbe svng a:ngí yv:ngò we dvzøm yv:ngà we mídat pènø vkvt a:ngò lvpvt

svng Gvray bvnlì taq dvzøm lvm dvle bøà we Katholic shvngømré shvrúngshúpè Fr. Tom Colucci íwe svng shálún shìwe íe.

Kàtvlíng svra paul Hpu Ye Dwe.