Mòngàn làngré àngni

Svrabín koqkámpè Francis shøn we taq "yadø yóga zønli vkøn we rvtø taq tasvng dvbang ké lvm gvzà vchyak á:mì làngrérì kaq svng Gvray shóngshìe shvngømré vdòng taqø gø nàmaq nàchvkvm shà" wae. Shvngømré rì taq kèní vsvngrìò rà vchyak we dangrì taq nvrøm dvbumshìe. Noqngøm tvràrì taq jèní dvbangshì lvm gvzà vchyak ráì. Yàdø yóga zønlì vkøn we rvtø taq làngrérì taq kèní tùbumshì lvm dvkámvtnìe. Nàmaq vlù vlàngrì taq nvngòn kùngàrì èvl nønge. Nàmaqò lvpat nø tiqdá vsvngrì kaq vjú zí leqlún nøng.

Vpøwe dèni taq Radio Veritas Asia taqkèní làngrérì kaq svng Mother Teresaò mòngkà taqkèní nvngòn zí mvyø ìe.

Vsvng lvpat nø vko vkáng tiqlòng íe welòng svng ètap shì.

vsvng lvpat nø vnvpe, vpø shvring shàì

Vsvng lvpat nø yøpnáng shøngran tiq lòng íe, chvpdap èwàò.

Vsvng lvpat nø shìwvt àngpvn pvn íe, we lòng svng vtoshì leqlún nò.

Vsvng lvpat nø bvnlì døngjá tiqlòng íe, dánghøq wá dèzaq shì.

Vsvng lvpat nø gvcøp boy tiqlòng dø íe, we lòng taq èzáng shì.

Vsvng lvpat nø kà svdiq tiqlòng íe, cvn dèdøngò.

Vsvng lvpat nø nøt yul nøt dvshà lvm tiqlòng íe, welòng svng mvngvn nò.

Vsvng lvpat nø mvkún Zaywàcè tiqlòng íe, welòng taq èyo shì.

Vsvng lvpat nø dvshà mvhøt lvm tiqlòng íe, we lòng svng nàtoò.

Vsvng lvpat nø dvyól shì lvm tiqlòng íe, nøt shè løm shì.

Vsvng lvpat nø dvzaq dvkáng shì lvm tiqlòng íe, mèsère ni.

Vsvng lvpat nø shvlá lvm lòng íe, chvpdap èwàò.

Vsvng lvpat nø vtangshaq vpøe, mè gèyaqni.

Vsvng lvpat nø lvpat tiqlòng íe, dè kángshì.

 Mòngàn rvpdoq (UN) nvng làngrérì August 12 ni nø mòngàn làngré àngni wanø 1999 nøng mòngàn rvpdoq UN lìpùng taq mvsat yàngà we ínø vlù vlàng svmaré lvngàrérìò vhángnø vlíng vpo lvm, vko vkángrì zìdang dvhàng lvm nvng bvnchvtrì dvshèr lvm mvngushì we àngni tiqni íráì. 1965 nøng taq vra shì bøì we kàciq 2037 ciq rìtaq vsvng dvcìrì dvhø taq mòngzøl lòng vl lvm, tasvng vpø shvring kélvm làngrérì dvhø taq vrashì nø vrìng bøà we íe. 1965 nøng taq kèní 1975 høq we lìpùng, wulaq bvnlìrì nvng svngpvn vtoq vtip we Council rìnø làngrérì nvng vzøm lvm zìdang vháng lvm nvng sømsaq mòngzøl lvm dang 3 dang svng mvdøng tvnùngò nø vra shì bøì. 1985 nøng taq vra shì bø ìwe kàciq 40/14 taq nø làngrérì nvng singnø vdu vbóng we tvnù mangárì svng vto lvm nøt vrá bøì. Tvnùng kàru taq làngré wawe vdòng taq dvcìcèrì àngpvn pvn vl nø gvzà gwaqwe svng síngshá lvm vchyake. Hí wvl dvciq we làngrérì, rìngzì wamàrì taq vl we làngrérì nvng svmaré mvdò rì dvpat tùbum shìrà we dangrì dvpat shvla we dvlàrì gvl shì lvm dvkám we íe. (Kàciq 50/81) 2009 nøng December shvlá lìpùng taqkèní tvnùngvtnà we taq kàciq 64/134 svng 2010 nøng August 12 ni taq kèní mòngàn làngré àngni svng mòngàn zìdang mvtaq móngdàn vrvmø gø wàlvm dvkám bøà we íe. Weni taq nø 1985 taq kèní 25 nø vhøm bøì we àngni gø íe. 1999 nøng December 17 ni taq vra shìwe kàciq 54/120 taq (1988 nøng 8-12 August) taq wàbøà we mòngàn làngré àngni lìpùng nø mòngàn taq té vtang lìpùng íe wae. 1996 nøngò lìpùng taq nøt vrá bøìwe kàciq nø làngrérì dvpat téwa síngsháâ lúnlvm nvng àngmaqò ràwe dang taq téwa vrashì lún lvm dvkám bøà we íe.