Mòngàn làngré kùngà àngni

Mòngàn làngré kùngà àngni

Mòngàn taq dèni la vsak 15-24 nøng dvhø làngrérì 1.2 wàn (billion) vl we ínømòngàn vsvngrìò 16% vl we íe. July 15 ninø mòngàn zìlàngré kùngà àngni íe. Zìlàngré rìò lvpat zìdang vháng lvm dvzaqshì we taqkèní làngcha vlíng vpo we dang, bvnlì màdá íwe dang, dvshà mvhoq we dang, svmaré nvng nvngàré dvhø vdu vbóng we dvrá, vzivrùng wawe dang rìtaq tùbum shìwe íe.

Ínìgø zìlàngrérì taq shaqrérì mvdàm bvnlì màdá íwe vsvng 3 dvtàng téluq we íe. Bvnlì zìbè vcipwe, bvnlì vdòng màdu màbóngwe nvng paqzí zùngrì taq kèní bvnlì wàng svng vpo we rì gvzà luqman shìe. Wewa mvtaq svmarérì taq bvnlì màdá íwe nvng bvnlì zìbè mvluqwe bvnlìrì taq téwa wáshìwe íe.

Mòngàn làngrérìò kùngà àngniò dvlàrì Mòngàn làngrérìò kùngà àngni nø gvzà vchyak we íe. Vháng manshìwe móngdànrì taq vlwe làngrécèrì bvnlì màdá luqman shìráìwe nø dènila wulaq bvnlìrì nvng svngpvn dvcìrìò vhømìwe bvnchvt tiqlòng íráì.

Dèniò rvtø taq bvnlì màdá vlwe làngrérì 73 sésèn vlnø nøng vrvm 40 sésèn gø bvnlì àngshár taq zángshì lvm dvpat bvnlì vko vkángrì yúm vtang 475 sésèn shvzøngalvm tuqrawe àngsénøng vdòng taq wárà:ámì. Gún dvtøpmòwe tiqlòng taq wulaq bvnlìrì nvng vhánglún lvm bvnlìrì taq paqzí shawe làngrérì dvpat bvnlì tvlú dvgøòwe mvl wanø shálúnshìe.

Vdu vbóng we bvnlì lúnlvm nø yakwe bvnchvt tiqlòng ílúngì. Mòngàn móngdànrì mvlúng taq rìngzì rvgaq taq bvnlì wavm wenø téluqwe svng yánglúnshìe. Bvnlì wavm we rìtaq kèní 1.44 billion gønø zìdang vcipwe bvnlìrì taq wavm we íe. Mòngàn svngpvn dvcìrì taq tuqrawe 2030 nøng taqnø ngàngdøngwe zìdang vhánglvm dvlà tiq lòng svng wálún lvm gvl bøa we íe.

Welòng dvpat dang vrvm taq kèní tùbumshì lvm gø rà vchyak ámì. Dvshà mvhoq we lvpat rìsvng shvngăn lúnlvm dvpat vdè móngdàn vdòng taq màdu màbóng werì nvng svngpvn dvcìrì svngbe vzømweí vhángwe zìdang wulaq bvnlìrì mánrà:ámì we mvtaq svmaré nvng nvngàré dvhø taq gø vdu vbóng dø wáshì lvm dvzaqshì ràbøi.