Mòngàn rvgaq yachàngò Jubeeli

September 1-4 høq mòngàn taq Christian rìnø pvnmán we lvngcha wanø washì we svng yáng lúnshìe.

Vle á:mìwe nøngrì vdòng Europe móngdànrì taq vlwe Gvray kaq kámwe vsvngrì nø angmaqò kámnøt svng svkse wáshì nø pvnmán we dang svng shvgùn shvrìngò we bvnlì rìtaq vzøm lvm gvzà dvkáng shìwe svng yáng lúnshìe.

Gvrayí pvnmán we nø bashàrì dvpat jejú gømpaq tiq lòng íe wanø Cardinal Bagnasco nvng Rev. Christian Krieger ò tvnùng lìga taq Gvrayò pvnmán we nø vsvngrì mvtaq nìna sharì shvngbe dvpat jejú gømpaq írat nø welòng svng Gvray shóng wámshìdø roqgvr shì ràe wanø dvkám bøà.

Svrabín koqkámpè Francis taq kèní gø laudato Si wawe nøngmaqò chøm íwe rvgaq yachàng svng roqgvr shàì, chømrvp cèrì íshàwe vsvng shvngbe gø mòngzøl we taq vhánglún lvm dvzaqshì ràwe svng tvnùng kàru vtàn bøà we íe.

Gvray nø pvnmán shú angkàngpè íwe dang svng síngrál lvm dvpat shvnshvŕ pvlàcèò jór nvngòn taq kèní síngshá lúnrà we nvng wedø síngsháì we kat wa mòngzøl we jejú svng vtoshì lún we svng jøm paqzí vdè Jurgen Moltmann taqkèní gø tvnùngvtnà we íe.

Christianrì taqkèní yadang nvng singnø vjúrøt bóyrì 1989 taq Basel Myoq, 1997 nøng taq Graz, 2007 nøng taq Sibiu myoq rìtaq wa yàngà we íe.

Dènø vdòng taq nø yadø yóga zønli vkøn ráì we írat nø yóga zønlì vgám we ku kèní ang dè dè vyáshàì nø vlrà á:mì. Wewa mvtaq rvgaq yàchàngnø tiqni mvdàm tiqni vlíng mvnshì ráì nø vkat mànshì ráì svng gø we tvnùng kàru taq vtànvnà.

Ya tvnùng kàruò làngdøm taq Christianrì shvngbe nø mòngàn pvnmán we lvngcha taq Jubeeli wawe kà vgo taqkèní walvm dvkám bøà we íe. Ya Jubeeli wawe nø Gvray shvnshvŕ kàru taq kèní tuqráì we ínø rvgaq yachàng svng vdu vbóngdø mvgam màshvla we dangrì vhømshì rawe rìsvng vgámnø roqgvr shì lvm wanø dvkám weí tvnùng bøà we íe.