Mòngàn taq vsak shì màrvm we cvmrérì svng bvnlì taq lángò we dang vgám we àngni

Mòngàn tvmø bvnlìrì nvng sing we mvdò (ILO) taq kèní vsak cvm we cvmrérì svng bvnlì taq dvzvŕò we dang vgám lún lvm dvpvt yadø íwe dvlà svng 2002 nøng kèní wá pvng bøa we íe. Mòngàn taq vsak 5-17 dvhøò cvmrérì svng bvnlì taq lángò we 152 wàn gø dvngte í nø werì taq kèní 48% cvmrérì nø vsak 5-11 dvhø taq kèní cvmrérì ínø 28% ò cvmrérì nø 12-14 nøng vdòng taq kèní nvng 24% nø 15-17 nøng vdòng taq vl we svmaré cèrì íe wa nø gùn dvtøp we taq kèní shálún shìe. We dø íwe rìtaq kèní 71% cvmrérìò bvnlì nø gvzà yak we bvnlìrì taq wá vdu we ínø 29% cvmrérì nø jak rúngrì taq dvzvŕ:vmòe wa shálún shìe.

Mòngàn taq we dø íwe cvmrérì vdòng bvnlì zìbèrì shvlá wa mvlúnò we mvtaq góng laqyà nøntmvsøn nvng paqzí dang rì taq vnøn dvzvŕò we íe. Vháng mvnshì we móngdànrì vdòng taq cvmré 4 gø taq kèní 1 gø (vsak 5-17 nøng dvhø) rìnø bvnlìri taq kèní góng shiqshàn tvrà nvng vháng lúnlvm dangrì svng vnøn dvzvŕòe wa shá lúnshìe. Africa móngdànrì kèní cvmrérì 5 wvĺ 1 wvĺ 72 wàn gø dángte nø vsak màrvm we cvmrérì svng bvnlì wá dvzvŕò we ínø mòngà taq luq vtang íwe svng shálún shìe. We mèpvng Asia nvng Pacific rvgaqrì taq nambvt vní luq vtang ínø 62 wàn gø dángte vl we svng shálún shìe.

Mòngàn taq vsak màrvm cvmrérì bvnlì wawe 10 gø taq kèní 9 gø nø Asia, Africa nvng Pacific rvgaqrì taq kèní íe. Shvng gvmsùng mvluq we móngdànrì vdòng taqø we dø íwe cvmré bvnlì wa vsvng luq vtang ínø shvng gvmsùng vdu vdang vl we móngdànrì taq 9% dángte vl nø shvng gvmsùng vháng we móngànrì vdòng taq 7% dángte vl we svng yánglún shìe.

Covid- 19 rvtø vsak shi màrvm we cvmrérì kaq bvnlì dvzvŕ:vmò we dang svng vgám lvm, 2020 nøngò Mòngàn taq vsak shì màrvm we cvmrérì svng bvnlì taq lángò we dang vgám we àngni taq yàdø íwe bvnchvt rìsvng téwa dvdamì nø síngshá lvm vchyak:ámì. Yadø vna zønlì vkøn we rvtø taq dang àngpvn pvn taq vnøn lúngì we írvt cvmrérì svng màdvrá dø bvnlìrì taq dvzvŕò we svng vyuq sháò we svng shá ràwe íe.

Svrabín koqkámpè Francis taq kèní gø cvmrérì svng vshuq dø bvnlì dvzvŕò we svng vgám lvm dvkám bøà. Svrabín koqkámpè Francis taq kèní we døí we bvnchvt rì svng vkám lvm mvdøng mvdaq dvkám bøa we mvtaq 2014 nøng June 14 ni taq "All together Against Child Labour" wa we lìga book svng gø vruò nø dvkang yàngà.

Svrabín koqkámpè Francis taq kèní 2013 nøng June 12 ni taq mòngàn svng cvmrérì svng dvkiò nø bvnlì vdøk vnvng wá dvzvŕ we nø jøng jøng ni vshuq waò we íe wa nø tvnùng bøa. Cvmrérì nø àng maqò chøm vsvngrì nvng kámnønt tvràrì, paqzí dangrì yaq cvnshì nø shóngnønt vdòng taq mòngzøl dø vl lún lvm tùbuma rà we shvng dvkám bøa.

#source: Unitednations;vaticannews

Add new comment

1 + 0 =