Mònggv̀n dvshà mvhøtwe dang shvmáng lv́m àngni

Mònggv̀n dvshà mvhøtwe dang shvmáng lv́m àngni (Oct 17)

Nǿngni nǿng vrv̀m October 17 ni svng Mònggv̀n dvshà mvhøtwe dang shvmáng lv́m àngni wawe kà vgo taqkèní paqzí dvkø̀mwe lìpùngmè rì wáshì wegø íe.

Yani wáshìwe ò àng manggá nø mònggv̀n vsvngrì dvshàwe dangrì taqkèní àngmaqò dvzaq dvkángshì we tvràrì svng vpǿ shvringā lv́m dvpvt nvng àngmaq dvpvt vlún vkángrì mánā lv́m wawe manggá taqkèní wáshì wegø íe. Dvshà mvhøtwe dangrì svng shvmáng lv́m wawe nø rvtø̀ àngdongcè taqní wálúne wawe dvlà taq zǿmshìnø yani svng wáshì wegø íe.

Yani taqnø mònggv̀n taq mvshv́mhoq vsvngrì àngkíng, àngyá sèn gǿ vlwe ínø̀ àngmaqò lvpatrì svng vpǿā we, àngmaq ò dvzaq dvkángshì we dangrì svng dvgùng shvringā we àngni íe. Wedø dvshà mvhøt we dangrì shvngbe svng gvsat shvmánglv́m nøngmaq shvngbe vzø̀:mìwe kù:ngà shaqí dvzaq dvkángshì nø dvsher, dvshvng lv́m dvkám wegø íe.

Mònggv̀n dvshà mvhøtwe dang shvmáng lv́m àngni svng 1987 nǿng October 27 ni kèní mvsat pv́ngshì ráì wegø íe. Wenitaq Pari myuq taq vsvng gorø 100000 rvzé gǿ mvngushì nø 1948 nǿng taq mvsatshì yv̀:ngìwe mònggv̀n svngpv̀n vko vkáng nvng singwe nøt vrá kàru taq wur mv́r shvmvr shì bǿì wegø íe.

Wedø mònggv̀n vsvngrì naqciqriq dvshà lòngsvng vhǿ:mò wenø svngpv̀n vko vkángrì mvcv̀nwe móngdàn dvrárì ratgø íe wanø dvkám wegø íe. Wervtø̀ kèní pv́ngshì ráì nø kámnøt tvràrì, vsvng mv̀ngpòng mvdòrì shvngbe nø kà svdiq gv́lshì we nøt vrá kàciq taq wur mv́r shvmvr shì bǿì wegø íe.

Ya 2022 nǿng ò Mònggv̀n dvshà mvhøtwe dang shvmáng lv́m àngni nø svngpv̀n vdu vbóngwe dvrá vdòng, cømsaq mòngzø̀lwe tvrà nvng mònggv̀n yachàng dvpvt tiqdø vzø̀:mì nø bv̀nlì wàlv́m nøt vrá kàciq íwe “ laqyà shvngbe dvpvt vnvpwe dvgùng” wawe kà vgo vdòng taq mvngushì nø wáshì lv́m gø íbǿì.

Yalòng kà vgo nø 2022 nǿng nvng 2023 nǿng dvpvt íwe svnggø shálún shìe. Mònggv̀n vsvngrì ò dvgùng wawe nø àngmaq ò lún vkáng mvpv́ng tiqlòng gø íe. Weratnø we dvgùng walòng svng vpǿā kelv́m nø vsvng gǿ vrv̀m nvng singwe gø íe. Dèni bat taq pv̀nyàn dvshà mvhøt lv́m tvrà rvnaq ráì wenø we àngmaq ò svngpv̀n dvgùngrì svng màpǿ shìwe tvrà íe wanøgø shǿnlún shìe.

Mònggv̀n pø̀zá mvdò taqkèní gùn dvtøpwe taq yadø mònggv̀n vsv̀ngrì dvshànø yakwe dang vhǿ:mò we yv́ngkèní vsv̀ng gorø 88 sé sèn gǿ kèní 115 sé sèn gǿ nø téwa dvsha mvhøt we tvrà taq vløp dvzv́r:ò wegø íe. Werì taqkèní mvlúngka vsvngrì nø Asia dan tìni lvp nvng Sahara móngdànrì taq vlwe vsvngrì íe wanø gùn dvtøp we taqkèní shálún shìe.

2021 nǿng mèpvng kaq wedø dvshà we vsvng gorø téwa luqmvnshì ráì wesvng gø shálún shìe. Mònggv̀n móngdànrì vdòng dang àngpv̀n pv̀n taqkèní dvjáng zønlirì vkǿnwe nvng tasvng vzi vrùng wanø mvjànrì dvbu:ngò we yv́ngkèní téwa móng vsvngrì taq dvkøqwàngrì vkǿn dvzv́r:vtnà we íe.

Nøngmaq dvhø taq svngpv̀n zìdangrì màbóngwe tvrà svng shvdøng lv́m wawe manggá svng dìì we mǿ:í. Téwa dvkøqwàngrì taq vløpwe dvshà vsvngrì kaq chutcháng lúnlv́m wawe manggá taq bv̀nlì wá dvzaqshì ràbǿì.

Wedø dvshà vsvngrì kaq dvki vrèwe, rvwìngwe dangrì svng gvsat shvmv́ngnø vsvng tiqgǿ taq vl vduwe dvgùng, svngpv̀n vko vkángrì svng vpǿwe cvndøng dvrá svng shvngàng shvdøng lv́m dvpvt ni íe.

Mònggv̀n taq vlwe dvshà vsvngrì ò lvpvtrì svng chutcháng lúnlv́m, téwa àngmaqò lvpvtrì svng tubùm dvbangā lv́m dvzaq dvkángshì ràwe gø íe.

Weratnø nøngmaq shvngbe nø tasvng dvshà mvhøt vsv̀ngrì dvpvt nøngmaq tiqgǿ vrv̀m taq vlwe zitnøt, paqzí kù:ngàrì nvng pø̀ zaqshøprì taqkèní tubùm dvbangā kelv́mnø laqni vchvk wegø íe. Deni bat taq yadø dvkøqwàngrì nvng dvshà mvhøt we rvmè taq vdǿn kéò we vsv̀ngrì ò nøt mvsø̀n kà shaqrì svng táāì nø dvdam dvtøp lv́m wáshàì.