Mònggv̀n rìngzì rvgaq svmaré rìò àngni

Mònggv̀n rìngzì rvgaq svmaré rìò àngni

Mònggv̀n rìngzì rvgaq svmaré rìò àngni svng October 15 ni taq mvsat shìnø̀ wáshì wegø íe. Weni ò lvmv̀ng tvyørì taq rìngzì rvgaq vlwe svmaré rì nø kvtvm tvmø bv̀nlì tvrà rì taq vháng vlún lv́m nvng mvzáng luqpø̀n lv́m, dvshàwe tvràrì vmv́ng lv́m dangrì nvng singnø̀ tubùm dvbangā we àngni gø íe.

2008 nǿng October 15 ni kèní mònggv̀n rìngzì rvgaq svmaré rì ò àngni svng mvsvt shì ráì wegø íe. svmaré rì taqkèní rìngzì rvgaq wulaq tvràrì taq shò shò wa dvzaqshì nø̀ mvzi dvyø̀ rì kvtvm we nì nà rì roqrim we nvng tiqchø̀m vsv̀ngrì kaq mvzáng luqpø̀n høq tubùmā lúnwe tvrà rì shvngbe nvng gø vzø̀m we íe.

yadangrì nvng singnø̀ mònggv̀n rvpdoq UN nø 1945 nǿng kèní àngcé mvzuq nǿngrì naqhøq vrang pv̀ng ráà we sv̀ngpv̀n dvsháza tvrà ngàngdøng lv́m wawe àng mvtú kèní pv́ngshì ráì wegø íe.

mònggv̀n rvpdoq UN ò dvlàrì yv́ngkèní rìngzì rvgaq svmaré rì ò lvpat rì svng vháng vlúnlv́m tubùm dvbangā we tvrà gø íe. 1995 nǿng Mìwà móng Bijing taq wáshì bǿì we 4 boq wa boq mònggv̀n svmaré rìò kø̀mzøp lìpùngmè taq svmaré rì ò kùngà nvng àngmaq kaq svng vpǿ shvring lv́m wawe kà vgo kèní vhøm nø mvngu shì bǿì wegø íe.

lìpùngmè taq vrúm vsvr we rìngzì taq vlwe svmaré rì dvpvt vtoq vtiplv́m tvrà nvng vtoq vtip we paqzí rì vrangā we bv̀nlì nø gvzà ni vchvk we dang nøt vrá kàciq gv̀l bǿà wegø íe. we nøt vrá kàciq svng Geniva nvng Tunis 2005 nǿng Agenda taq gø dvbá lún bǿà we íe.

we yv́ngkèní mònggv̀n rvpdoq UN ò dvtú we 2007 nǿng December 18 ni taq nø mònggv̀n rìngzì rvgaq svmaré rì ò àngni svng mvsvt shì lv́m dvkám bǿà wegø íe.

mònggv̀n rìngzì rvgaq svmaré rìò àngni svng dèni bat taqnø mònggv̀n móngdànrì vrv̀m taq wáshì ráì we ínø̀ rìngzì rvgaq vlwe chø̀m dø̀ngku rì svng kupgvrā we àngmaq ò shagóng shiqshv̀n tvrà rì svng tubùm dvbangā we nvng àngmaq kaqsvng vpǿ shvring we bv̀nlì rì wáshì ráì wegø íe.

mònggv̀n rìngzì rvgaq svmaré rìò àngni svng wáshì we àng tvyø rìtaq

paqzí rì dvtit tvle kewe, October 15 ni taq svmaré rì àngmaq ò tvrà dvzáng kàrurì vru nø̀ Social Media mvdam hvpò we rì wáshì we íe.

we ni ò tvyø̀ rì svng NGO mvdò rì nvng téwa wur vzø̀m nø̀ rìngzì rvgaq vlwe svmaré rìò lvpat rì vháng vlún lv́m, vlíng vpo lúnlv́m dvzaq shì we íe. svmaré rì dvpvt paqzí tvrà rì taq dvbangā we scholarship rì mv́nā we, pø̀ gv̀msùng rì dvbangā we, shagóng shiqshv̀n tvrà rì taq dvbangā we tvrà rì wáshì wegø íe. svmaré lvngàré dvhø̀ rìn vrá íwe vko vkángrì svng zíā we tvrà rì wá dvzaq shì we àngni tiqni gø íe.