Mònggv̀n shiqshàn ràlàng dvp íwe (WHO) taqkèní mvsat shì mònggv̀n mvløt mvaq lvm àngni

Mònggv̀n shiqshàn ràlàng dvp íwe (WHO) taqkèní mvsat shì mònggv̀n mvløt mvaq lvm àngni wanø̀ May 31 ni svng mvsat shìnø wá vdu we íe.

Weni wáshì weò àng mvtú nø mvløt aqwe ò svre vyáshì ràwe dang nvng shagóng shiqshàn tvrà dvpat paqzí ziwe nvng mònggv̀n vsvng rì , vlù vlàng rì kaq svng vring lúnlvm wawe manggá taqkèní wáshì we gø íe.

Mvløt aqwe yv́ngkèní bønwe yóga rì, vsvng lvpat rì shí dvzv́r we dang rì kèní shvyúm lúnlv́m dvpat dvdam manggá gv́lshì we gø íe. Ya 2022 nǿngò mònggv̀n mvløt mvaq lvm àngni dvpat kà vgo nø “toniò rvgaq gùr gùr svng roqgvr ì” wawe íe.

Mònggv̀n mvløt mvaq lvm àngni svng mònggv̀n shiqshàn dap íwe WHO taq vbá we mvlúm móngdànrì taqkèní 1987 nǿng taq mvsat vjøn yv̀ngà we íe.

Mònggv̀n taq nøng vrvm mvløt aqwe yv́ng kèní mònggv̀n vsvng rì 8 sé sèn rvzé gø shìe wanø mònggv̀n shiqshàn dap kèní gùn dvtøp we taq yv́ng lún shìe. We mvløt aqe wawe taq mvløt sap í wàò we mvløt rì mvtaq dvgá pvnrì íwe Hookah smoking, narghile, shisha nvng goza rì gø vbáe wae.

Mvløt cvp svng kvtvm nø vmaq we dang taq lángshì we vdú vna langwe taqkèní vsvngrì ò shiqshàn tvrà svng zá dvzv́r we gø íe.

Mvløt aqwe nø rvshú, shaq vhé shì tvrà rì nvng TV yóga rì bønsháò we mvtaq shaq vhéshì tvrà svng zá dvzv́r ò we nvng vsak svng vré shìwe høq shaq svre dvké we íe.

2008 nøng taqnø WHO shiqshan dvp kèní yadø mvløt svp kvtvm we bv̀nlì rì svng vgám we nvng nvmvm we bv̀nlì rì svng gø vgám lúngà wegø íe. Monggv̀n taq móngdàn vsvng luq vtang vlwe Mìwà móng nø mvløt nvmvm we bvnli té vtangku  wavm we móngdàn tiq móngdàn gø íe wanø shálún shìe. 2014 nøng taq mònggàn taq mvløt nvmvm we 30 % nø we Mìwà móng taq íwe svng shálún shìe.

Mvløt svp kvtvm we nø tòni ò rvgaq svng gø vtù vrè we nvng gvyaq dvzv́r lúnò we svng shvdøm we gø íe. Mvløt svng kvtvm nø vmaq we nø vsvng tiqgø ò shagóng shiqshàn tvrà dvpat vtang shaq svre dvké wegø íe.

Yani taq dvdam shì vdu we nø mònggv̀n taq zønli dvjáng møí we vna rì kènì vsvng lvpat rì shìwe dang taq 3 wv́l 1 wv́l cènø shvyúm lúnlv́m dvpat wanø dvdam shìwe í yani ò tìyø svng wáshì nø vring wegø íe.