Mònggvn á:maq dvrè mángshèr lvm angni

Mònggvn á:maq dvrè mángshèr lvm angni

2018 December 20 ni taq mònggvn rvpdoq UN lìpùngmè taqkèní mònggvn á:maq mvzáng luqpønlvm àngni wanø mvsat shìbøì we gø íe. 2019 nøng kèní June 7 ni vrvm mángshèrwe á:maq dvrèrìò luqpønwe vjúrì svng vpø shvring lvm rvtø lvngchva tiqni wanø mvsat shì bøìwe íe.

Yani svng mvsatā lúnlvm dvpat mònggvn 73 boq rvpdoq UN lìpùngmè kaq svng shokshún kàru dang bøàwe íe. Welòng svng 2018 nøngò lìpùngmè taq nø nøt vrá bø mvsatshì lún bøà we gø íe. 2017 nøng dvgvp kèní yani mvsat shìlvm dang nvng sing nøFAO nvng shiqshàn dap kèní gø vto nø tubùmwe kàru shvlang bøà we gø íe.

Á:maq dvrè mángshèr lvm wawe nvng mònggvn móngdànrì Á:maq dvrèrì mángshèr lvm tvrà wawe nø gvzà yakwe bvnlì tiqdang ílongnø rvmá tvmø shvrà yáng kèní pvngshì ràlonge. Mvzi dvyørì, wunvm, kvtvmwe kèní àng dvtàng tàng làngdøm shutvm shvratvm we dvtàng høqshaq dvtøpnø dvdam ràlonge.

Mònggvn taq yadang svng yàngnø tubùm dvtøā we mvdò nø The food and Agriculture Organisation of The United Nations tiq mvdò wa vlwe gø íe. FAO nvng mònggvn shiqshàn dvprì vzømnø mònggvn vsvngrìò á:maq dvrè mángshèr lvm nvng shiqshàn tvrà svng roqgvrā we bvnlì svng wàò we svng yánglún shìe.

Ínìgø we á:maq dvrèrì mángshèr dø á:maq lúnlvm wawe nø we mvdòrì taqkèní dvtøpā weí wagø vdángvmwe mø:í, á:maq we vsvngrì gø vrvm taq gø shvláwa dvtøp vyáshì nø á:maq lvm vchyak we íe.