Mònggvn Dawn Syndrome yóga àngni (March 21)

Mònggvn Dawn Syndrome yóga àngni (March 21)

Macia wa tøshìwe svmaré tiqmè nø vsvk 43 nøng rvtø taq cvmrégóng bøne wae. Àngchømpè nvng døngku shvzøng shìwe 4 nøng íráìnø àncè lvngà svré Lucas svng gø shvzat bøà we íe.

Àng shønwe taq " ngà taq cvmré àngrácè góng svmaré nvng lvngàrécè bøn bø:ì we svng shálún shì bøì mèpvng we svmarécè gøtaq Down Syndrome yóga bøn we svng yánglún shìe wae.

Wekvt àngí we yóga vlwe svmarécé mèkaq cvmrégóng dvjálvm dvdamshì bøì. Welòng nø yoga shvzøm lvm dvpat íe wae. Ínìgø wedø waò we taqkèní ngámshìwe lvngàré cvmrégóng svng gø gvyaqshì lvm 35 % vlwe svng shálún shìe.

Ngàí dvhø gvzàni vrashì nø cvmré góng svng kadø wàlvm mvtú láshò sórí rvtø tiqni mvdàm tiqni yang mvnshì ráì.

1994 nøng November 11 nitaq we cvmré àngrácè wegøní svng shvzat lún bøshà.

Down Syndrome yóga shèrwe lvngà svré pè Gabriel taq nvrøm nvng singwe yóga vhømò nø ngé ràwe svng vhøm bøà. 

Yadø bvnchvtrì vhømò we àngmè Sara nø àng lvpat taq nøt cvmlvm shìwvtrì vhøm yàngà.

Ya Down Syndromeyóga yalòng nø kapà rat vsvng tiqgø taq bønwe svng mvsháshì we chromosome 21 wapvn íe wae. 

Yalòng nø mònggvn taq vlwe yóga gømla tiqlòng bøn ráì.

Mònggvn taq gùn dvtøpwe taqkèní vtànò we nø yalòngnø vsvng tiqgøò nøt, shagóng nvng shiqshàn we dang svng vréshì we yóga tiqpvn íe wae.

Down Syndrome yoga yalòng nø mònggvn taq cvmré gòni 1000 gø taq 1 gø bønwe ínø tiqnøng vdòng we yóga bønwe cvmré 3000- 5000 gø vle wae.

Down Syndrome yóga yalòng vlwe cvmrérì dvpat shiqshàn lvm dang, paqzí dangrì taq shvladø tubùm dvbangā ràe.

Wedø ínøwa vsvng tiqgøò zìdangku vháng vlún we íratnø vsvng mvngpòng mvdòrì shvngbe taq bvnlì døngjá vlwe íe.