Mònggvn lèga paqzí àngni.

Mònggvn lèga paqzí àngni.

Lèga paqzí wawenø svngpvn vko vkáng, vsvngrìò shvla we tvrà nvng bvnlì døngjárì íe. Yani bøn ráì wenø svngpvn dvcìrì zìdang vháng lvm, mònggvn møngzøl lvm nvng lèga paqzí wawe svng vpø shvring shálvm wawe tvnù mangárì taqkèní January 24 ni svng mònggvn lèga paqzí àngni wanø mònggvn rvpdoq UN taqkèní mvsat shì bøì we íe. Dènila rvtø taq vlù vlàngrì nvng cvmrérì 258 million gø dángte nø lèga paqzí cvnshì mvlúnò we íe wae. UN taqkèní gùn dvtøpwe taq vlù vlàngrì nvng cvmrérì 617 million gø dángte nø lègarø mvsháò we nvng cunpvn paqzí mvshá lúnò wae. Lèga paqzí wawe nø svngpvn vko vkáng tiqlòng ni íwe Lèga paqzí cvnshì we dang shvrúng nøt zàngwe vsvng tiqgøò lvpat nø kadvgvp gø màsvrøng wanø shønwe kà vle. Mònggvn svngpvn vko vkáng tvnùng kàru 26 tut taq lèga paqzí nvng singwe vko vkángrì tvnùng shaq íe. We tvnùng kàru taq dvpø màdá lèga paqzí cvnshì lún ràwe nø mvdøng vchyak we svng vru shaq íe. Cvmrérìò lèga paqzí dang vko vkángrì nvng singnø nøt vrá kàciq svng 1989 nøng taq gvlshì lúnyàngà we ínø we kàciq taq vsvng shvngbe nø lèga paqzí cvnshì lúnwe vko vkáng vl ràe wanø kàciq gvlshì shaq íe. Lmònggvn lèga paqzí zìdang vháng lúnlvm bvnchvtrì Lèga paqzí wawe nø cvmré rìò dvshá mvhoq lvpat taq kèní lutshì lúnwe gòngre tiqlòng ni íe. Ínìgø mònggvn taq vlù vlàngrì nvng cvmrérì taq paqzí cvnshì lvm nvng zùng dvdáng lúnlvm vko vkángrì mvlúnò we gø yánglún shìe. Lèga paqzí zìdang vnøn we àng mvtúrì Vsvngrì dvhø vzi vrùng wawe nvng mvjànrì rat cvmrérì nvng vlù vlàngrì taq lèga paqzí dang shálvm dangrì taq vbamshì dvzvŕòe. Mvjàn bønwe shvràrì nvng vzi vrùng wawe shvràrì taq vl vduwe cvmrérì nvng làngrérì nø àngmaqò lvpatrì shømløm lvm shvràrì svng wa yelshì ràwe írat vko vkángrì vto shì mvlúnò. Cvmrérì nvng dvshà mvhøt we dang Téwa vháng mvnshìwe móngdànrìò cvmrérì taq shiqshàn we dang nvngòn yúmwe, á:m-aq lvm mvluqpøn we nvng lèga paqzí cvnshì lúnwe vko vkángrì mv-vl we gø íe. Àngmaqnø téwa chøm vsvngrìò á:m-aq lvm dangrì taq wa dvzaqshì nø bvnlì wavm ràwe íe. Wángzà móngrì kaq yàmbvn bvn nø bvnlì wavm ràweí paqzí cvnshì lvm vko vkángrì mvlúnò we vsvngrì gø gvzà vl we íe. Vsvng shvngbeí rìn vrá vtoshì lúnwe paqzí cvnshì lvm vko vkángrì mv-vl dángte nø wedø dvshà mvhøt we lvpat taqkèní lutshì lúnlvm wawe nø mv-vl long. Yadø zønli dvjáng vkøn we dènila taq àngdè chøm taqwa vlì we taqkèní paqzí cvnshì ràá:mì we ínø Digital paqzí bat svng vpo ráì we gø dømshá rà lúngì. Ínìgø wedang taq vrúmnø yakwe shvrà rìtaq vlwe cvmrérì dvpat nø we vko vkángrì svng tvpshì mvlúnò. Weratnø lèga paqzí cvnshì lúnlvm dvpat yakwe shvràrì taq vl we làngrérì nvng cvmrérì dvpat dvdamā lvmgø gvzàni vchyak ráì. Vsvng tiqmaq taq online mvdàm kèní mònggvn paqzírì cvnshì lúnò we ínì gø vháng mvnshì we móngdànrì taq kèní vsvngrì nø paqzí zùngrì vrá poqā lvm rvtø svng wa cashìe. Yadø shìwvtrì vdòng taq vdè Myanmar móngdàn vdòng shvngømré shølshú vgorì taqkèní gø ya paqzí cvnshì lúnlvm dang svng kadø vrá téwa shvladø wálúnlvm tvrà svng dvdam shì ráì we íe. Yadø shìwvt rìsvng pvran lúnlvm dvpat Cardinal Charles Bo kèní gø 1965 nøng pin vsúyaqí tølvm bøà we Catholic shvngømré paqzí zùngrì 80 rvzé svng vrá vtáng lúnlvm dang bvnlì wáshì ráì we gø íe. Cardinal Charles Bo àng shønwe taq yarì nø shvnvt mvzørìí tvnuò nø vtølvm yàngà rìwa írat yarì svngbe svng vrá vtangshì lúnlvm dvpat shvngømré vrvm kèní shølshúrì shvngbe vzøm nø bvnlì wáràwe svng tvnùngvtnà we íe. 1950 vzàng kaq vdè Myanmar móngdàn vdòng Christian paqzí zùngrìò paqzí zìdang nø nvmsvr tìni Asia dantaq nø vháng vtang paqzí zìdang svng zílún yàngà we svnggø tvnùng bøà we íe.