Mònggvn mvrà mvvl cvmrérìò àngni

Mònggvn mvrà mvvl cvmrérìò àngni

Shvnip shvnvr we, vsvng cvm rìkaq mvdøng mvdaq pindap kèní tvpwe, shvtnò we, mvnyamvmwe, paqzí zùngrì, cìróngrì kaq gvsat we svngpvn vko vkángrì kaq vréshìnø gvyaqòwe rì vbáwe íe.

1982 August 19 ni Palestine móng nvng singwe lìpùngmè svng UN kèní wàbøà we taq mvrà mvvl we Lebanon cvmrérì kaq Israel cèrìí vréshì we svng vgám lvm dvpat June 4 ni svng mvrà mvvl we cvmrérìò àngni wanø mvsat shìbøì we íe.

yani wáshì ráì weò àng manggá nø cvmrérìò lvpat, nøt mvsøn rìsvng shvnip shvnvr we bvnlìrì kaq vgámlvm wawe íe. Mònggvn rapdoq UN taqkèní gø yadang nvng singwe cvndøng dvrárì kaq nøt vrá bøì. Yani bøn ráì mvshøl Graça Machel í mvjàn bønwe shvràrì taq vl vduwe cvmrérìò shìwvtrì nvng sing nø mònggvn svng shukshúnwe kàru taq cvnnø 1997 nøng UN lìpùngmè nøt vrá kàciq 51/77 kèní gvlshì bøì.

Ya kàciqrìnø mvjàn bønnø vzi vrùng wawe shvràrì taq vl vdu we cvmrérìò lvpatrì svng roqgvrā lúnlvm dvpat nvng àngmaqò lún vkángrì svng mònggvn vsvng shvngbe taqkèní vchvk gvlā lún lvm dvkám wegø íe. We kàciqrì taq vsvk shi màrvmwe cvmrérìò vko vkángrì svng roqgvrā ràwe nvng shvnat shvlangwe bvnlì rì màdvzr lvm wawe kàciqrì vbá we íe.

Ya nøngrì vdòng taqøgø mònggvn taq cvmrérìò vko vkángrì vnøn dvzvŕ we nvng we shìwvtrì taqkèní roqgvrā ràwe cvmrérì 250 million gø dángte vzi vrùng wawe mòngdàn rì taq vlwe svng gø dvtú bøà. Mà dvráwe bvnlì wawe mvdòrì taqkèní cvmrérìò vko vkángrì svng roqgvrā ràwe svng mònggvn svngpvn dvsháza mvdò kèní gø dvkám bøà we íe.

2030 nøng tuqrakvt mònggvn móngdàn vrvm taq vlwe cvmrérì vrvmnø zìdang vháng vlúnwe lvpatrì vrangā lúnlvm wawe rvmángzøng tiqlòng svnggø manggá gvlbøà we íe.

Source # United Nations