Mònggvn nøtcvm vsvngrì kaq shádvzit we àngni

Mònggvn nøtcvm vsvngrì kaq shádvzit we àngni

Yanila mònggvn taq yóga zønlì vkønwe, mònggvn dvjàrì, vsvng zìdang vcip we, vhángwe, shiqshàn tvràrì dvhø nøtcvm nøt vl vsvngrì dvpat nø màdu màbóngwe dvrá vdòng taq rvtø yanggúng nøtcvm lvm vhømòe. Yalòng nø vsvngrì dvhø tasvng rvwìng we taqkèní bungwe bvnchvt tiqlòng ni íráì.
 
Mònggvn rvpdoq UN vgorì taqkèní mònggvn móngdàn vrvmrì nvng mvngushì nø 2015 nøng taq nøt vrá bøìwe mònggvn vsvngrì zìdang vhánglvm wawe manggá 17 dang nø wedø íwe bvnchvtrì svng vgámlvm dvpat gø íe. Rvtø yanggúng vsvngrì zìdang vháng vlúnlvm wawe manggá SDG 8 dang nø mònggvn wulaq tvràrì shvlálvm, mònggvn taq hí wur dvciq we, kùngà vnønwe vsvngrì dvpat gø rìn vrá lún vkángrì dvpat gø roqgvrāwe íe.

Dèni bat bvnlì àngkàngrì tiqmaq taq wedø nøt cvm, nøt kùngà vnøn we vsvngrì kaq dánglún dángte dvbabngā lúnlvm dvpat wawe manggá taqkèní àngmaq svng bvnlì zíò we nø, àngmaqò nøt mvsøn kùngàrì dvshvt dvshèrò we dangrì walúngà we gø íe.

Yadø wáshì ráì we taqkèní nøtcvm we nøt kùngà vnønwe vsvngrì kaq tiqdangcè kèní dvbangā lúnwe gø íráì.

Ya 2021 nøngò nøtcvm nøt kùngà vnøn vsvngrì kaq shá dvzit we àngni taqnø mònggvn taq we dø íwe vsvngrì nvng rvwe zìdangø vlwe vsvngrì dvpat bvnlì vko vkángrì mvnā lúnlvm dang vrashì lvm íe wanø dvgø shìwe svng gø shálún shìe.

We lìpùng svng mònggvn rvpdoq UN vtoq vtip ràlvngdvp, wulaq nvng vsvng mvngpòng mvdòrì shølshú vgorì nvng mvngushì nø wàlvm íwe svng shálún shìe.