Mònggvn rvpdoq UN mvzáng dvp ò lìpùngmè nø téwa vdu vbóngwe mònggvn svng vrang lúnlvm vko vkáng tiqlòng íe wawe

Mònggvn rvpdoq UN mvzáng dvp ò lìpùngmè nø téwa vdu vbóngwe mònggvn svng vrang lúnlvm vko vkáng tiqlòng íe wawe

July 26-28 ni dvhø wáshì bøì we mònggvn rvpdoq UN mvzáng dang nvng singwe lìpùngmè taq Svrabín koqkámpè Francis taq kèní UN bvnlì àngkàngpè Anthonio Gutierrez kaqsvng svlang kàru tiqlòng taqkèní vtoq shì bøì we íe.

We shvlang kàru taq Italy móngdàn vsúyaq nvng UN bvnlì àngkàngpè Anthonio Gutierrez í shølwe mònggvn rvpdoq mvzáng nvng singnø vjú vl lvm tvrà svng tvnùng bøà we íe.

We kàru vdòng taq yadø vchyak we lìpùngmè yalòngnø Covid 19 yóga zønli vkønwe rvtø dvkøq wàng vhøm:ò we vsvngrì nvng shiqshàn tvrà taq vnønwe mvhøt lvm shìwvtrì vhøm:ò vsvngrì kaq chutchángā lúnlvm tvrà tiqlòng niíe wae.

Mònggvn taq mvhøt lvm shìwvtrì àngpvn pvn vkøn we rvtø taq téwa dvshà lvm, yòrlvm íwe covid dvjáng yalòng vrá tiqkvt vkøn ráì we í mònggvn vsvngrì dvhø vzømwe tvràrì vrøl á:mì wegø íe.

Svrabín koqkámpè dvtut shønwe taq mònggvn svng zìdang vháng vlúnwe paqzí rì àngpvn pvn mvn dvzaqshì we rvtø yadø dvshà mvhøt lvm shìwvtrì vkøn weí mònggvn nø rvgaq mvgong móngdø dvshà lvm wàng svng tuq ráì.

Mònggvn vsvng rìò vm:aq lvm mvzángrì luqpøn lvm tvrà taq vgámwe nvng svngpvng vko vkángrì mà dvráwe ku lángò vsvngrì kaq Svrabín koqkámpè Francis taq kèní shvyømwe mòngkà svng dvtú bøà we íe.

Yadø mà dvráwe bvnlì rì svng vgám nø gvsat lvm nø nøngmaq gø vrvm ò bvnlì døngjá tiqlòng niíe wanø gø shvdøm we íe.

Svrabín koqkámpè Francis taq kèní dvkám we taq mònggvn vsvng vm:aq lvm mvzángrì wàò we bvnlì rì téwa dvzaqshì wárà we nvng dvkøq wàng vkøn we shvrà rì svng tubùm dvbangā lvm rà vchyak we svng dvkám we íe.

Wewa mvtaq wama mvrìngrì taq kvtvm tvmø bvnlì rì svng gø nvngòn zinø dvbangā lúnlvm dvzaqshì ràwe svng gø shvdøm nø dvkám we íe.
Mònggvn móngdànrì taq yadø vsvngrì vm:aq lvm mvzángrì luqpøn lvm mvtaq bvnlì mvlúnò we làngrérì svng gø bvnlì zílún lvm tvràrì taqgø mvn dvzaqshì ràwe svng dvtú vtnà wegø íe.

Svrabín koqkámpè Francis làngdøm shønwe taq mònggvn vm:aq dvrè mvzáng luqpøn lvm tvrà vrá mvn dvzaqshì lvm bvnlìrì taq nvngòn zinø dvzaq dvkángshàì weí mònggvn svng mòngzøl dø dvcøp shvnvpmì wanø dvtú bøà we íe.