Mònggvn rvshú yóga angni

Yani mònggvn vsvng rvtø yanggúng rvshú yóga taq za vsvngrì kaq tubum dvbangā lúmlvm dvpat mònggvn zìdang ku dvzaqshì we angni íe. Yani svng nøng vrvm November 2 lvbán vdòng mø:íni 3 lvbán wa lvbán 3 nitaq wáshì we gø íe. Weni taq shiqshàn dvp ò cì savarì taqkèní yalòng yóga dang nvng singnø mònggvn vsvngrì kaq dvshat we angni íe.

Rvshú yóga (COPD) yalòngnø tiqpvn wa mø:í we taq rvtø yanggúng rvshú nvng singnø záyàng vhømò we vsvngrì kaq shøn mvyø we íe. COPD wawe rvshú yóga yalòng nø vsvngrì ò lvpat vsak svng vréshì we svre dvkéwe yóga tiqlòng gø íe. Vzàng kaqnø yadø íwe yóga svng bronchitis nvng emphysema wanø tøshì we ínìgø yakvt nø yarì shvngbe svng COPD wanø tø shìbøì we vdòng taq rvshú nvng singwe yóga shvngbe kømgøm vbá we íe.

Mònggvn zìdang ku 2015 nøng vdòng taq 3.17 sésèn gø yalòng yóga nvng shìbøì we taq 90% dángte nø vháng mvnshì we móngdànrì taqkèní íwe svng shálún shìe. Yalòng yógaò gømlarì nø shaq màgà we, shaq jvtwe nvng rvtø yanggúng vhòr kèwe rì íe. Mònggvn mónhdàn vrvm taq mvløt aqwe vsvngrì luqmvn shì ráì we nvng vsvng gorø luqmvn shì we írat yalòng yóga gø téwa vkøn mvnshì rae wanø daksun lúnshìe.

COPD nø yóga shèrlvm høqshaq cìzí mvlúnshì we ínìgø we yóga ang dvshaq lòngsvng shvyúmā lúnshì we íratnø vsvng vsak svng chángā lúnshì we mvtaq yóga svnggø vgám shì shvla we íe. Mònggvn shiqshàn dvp WHO taqkèní gùn dvtøpwe taq 2004 nøng vdòng ya rvshú yóga nvng shì vsvng 30 sésèn gø dángte nø rvshú vna nvng shìwe ínø tuqrawe 2030 nøng taqnø vna zønlirì taqkèní no. 3 svre dvké vtang tiqlòng írawe svng shvdøm we íe. Yani la mònggvn taq rvshú vna kèní za vsvng 251 sésèn gø dángte vl we ínø vle vmìwe 2015 nøng taq we yógaí shì vsvng 30 million gø íwe svng vtànvtnà.

Yalòng vna nø vháng vmì we móngdànrì mvdàm vháng mvnshì we móngdànrì taq 90% dángte bøn we svng shálún shìe. Yalòng yóga svng vsvngrì taqkèní vchyak mvwáshì we, cì mvzí shì we nvng yóga gømla mv vl we taqkèní mònggvn køp vkøn ráì we ínø yadang svng vgám we pø budget nø shiqshàn tvrà taq lángshìwe pø budget rìò 6% høqshaq vle wanø European Union kèní vtàn vtnà we íe.