Mònggvn sizø angni

Mònggvn taq vsvng 224 million gø dángte nø sizø yóga vle wanø 2014 nøngò gùn dvtøpwe taqkèní shálúnshì we ínø 1980 nøng taqnø 108 million gø vl yàngì we svng yánglún shìe. Yadø mònggvn taq sizø yóga vkøn ráì wenø 1980 nøng kèní 2 dvtàng dángte luqmvn shì ráì we ínø mònggvn vsvng rìò 4.7- 8.5 % høqshaq vháng mvnshì ráì.

Yalòng nø vsvng shagóng shù rawe taq cvnnø bønwe svng yánglún shìe. Sizø yóga taqkèní nemvn we, nvrøm yóga, hí wur shìwe nvng tvre gvyaq shì werì svng bøn dvzvŕ we íe. Yalòng yòga svng vgámlún lvm dvpat vdu vbóng vm aq we, mvnshì we nvng mvløt mv-aq we dangrì taqkèní gø vgám lúnshìe. Yalòng yóga svng vgám lúnlvm dvpat pvngyàn yôga jepshì lvm gø vchyake.

2007 nøng November 14 ni svng mònggvn rvpdoq UN lìpùng taqkèní yani svng mònggvn sizø angni wanø mvsatshì bøì we íe. Yadø mvsat shìráì wenø shiqshàn tvrà dang taq téwa vchyak wálún lvm nvng shishàn we paqzí dang kèní téwa tùbum kélún lvm dvpat gø íe. Yani svng mvsat shìwe kàciqrì taq sizø yóga svng vgámwe nvng singnø móngdàn zìdang ku vchyak lùnø walvm dvkám we gø íe.

Ya 2020 nøngò mònggvn sizø yóga angni taqnø mònggvn cì svra/ maqrì taqkèní yalòng yóga nvng singnø mònggvn vsvngrì kaq dvshatā lúnlvm wawe dvlàrì gvlshì we íe. Shiqshàn dang tvrà taq chapdap bvnlì wawe cì svra rì taqkèní yalòng sizø yóga vl we vsvngrì kaq tubumā nø yalòng yóga vgám we dang taq dvzaq shìlvm gø gvzà vchyake ráì.

Sizø yóga vhømò we vsvngrì taq yaklvm shìwvt rì angpvn pvn vkøn we ínø wedø vhømò we vsvngrì kaq tubum dvbangā lúmlvm gvzàni vchyak ráì. Sizø yóga bøn we ang mvtúnø rvtø yanggúng záyàng vhøm shì ralong dvgvp Bangcria kèní Insolin lubøn dø shagóng dvpat zí mvlúnò we dvgvp bøn we íe.

Welòng taq kèní shvwi vdòng taqø gø Clugus svng luq dvzvŕ we íe. Sizø yóga 1. Vsvng tiqgø taq vl vdu we Insulin taq cvnnø cvm lvpat kèní bønwe 2. Vsak te rake shagóng vdòng taq Insulin vdu vbóng dø mv vl dvgvp bøn we 3. Cvmré góng íwe vsvngrì taq bøn we sizø yóga wanø 3 pvn vlwe svng vtànvtà we íe.