Mònggvn svmarécèrì ò angni

Mònggvn svmarécèrì ò angni
Yani mònggvn svmarécèrì ò angni svng 2012 nøng October shvlá 11 ni kèní nøng vrvm wápvngshì ráì we íe.
2011 nøng December 19 ni taq mònggvn rvpdoq UN lìpùng taqkèní October 11 ni svng mònggvn svmaré rìò vko vkángrì nvng angmaq taq vhøm shìwe shìwvt àngpvn pvn rìsvng dvdam-a lúnlvm dvpat yani svng mònggvn svmarécèrì ò angni wanø mvsat bøa we íe.
Yani taqnø svmaré rìò vhøm sháò we bvnchvtrì svng kadøwa gvsat nø jórlún lvm nvng àngmaqò kúngàrì svng dvhàng lvm dvpat dvdamnø dvbang shìlvm wáshì we gø íe.
Àngmaqò lvpat rì shømløm dø vl lúnlvm, paqzí shálvm nvng shiqshan we tvrà taq shvla we vko vkáng rì lún lvm gvzà vchyake. Yanila svmarécèrì svng tùbum dvbang shàì weí angmaq nø mònggvn svng vlíng vpo dvzvŕ lún nòe, dvgùng vl we shøl shú shvlárì bøn lún daqòe, dvcìrì dvhø gø døngku vdòng taqø gø shølshú angmèrì bønlvm rì ílonge.
Vle vmì we nøng rì taq svngpvn dvcìrì dvhø taq angmaq nø hí dvciq wul dvchiqwe vsvngrì nvng vchyak mvwà òwe vhøm mòe.
2030 nøng taq nø zìdang vháng lúnlvm dvlàrì 17 lòng svng 2015 nøng mònggvn shølshú vgorì taqkèní gvlshì bøì we íe.
Werì nø svmarérì nvng lvngàrérì dvhø tiqrá lúnkángrì dvhàng lvm 17 ciq íe.
1995 nøng taq mìwà móng Bijin myoq taq wáshì bøì we 4 boq waboq svmaré rìnvng singwe lìpung taq móngdàn 200 dángte kèní vsvng 30000 gø dángte mvngushì nø svmarérì ò lúnkáng nvng singwe nøt vrá shaq íbøì we íe.
Mèpvng nøngrì taqkèní nø we mvdàm téwa svmarécèrì ò lúnkángrì svng mònggvn zìdang ku wáshì lúngì we íe.