Mònggvn svmarérì kaq dvki vrè we dang vmáng lvm vgám we angni

Mònggvn svmarérì kaq dvki vrè we dang vmáng lvm vgám we angni

Svmarérì mvdàm dvki vrè we nø svngpvn vko vkáng vlèò we tvrà taq luq vtang íe wae. 1981 nøng Latin America kèní Garisbian svmaré mvdòrì angmaq svmarérì mvdàm dvki vrè we dang vgám we nvngòn dvtannø gvsat bóy wàráà we taq kèní pvngshì nø November 25 ni svng Mònggvn svmarérì kaq dvki vrè we dang vmáng lvm vgám we angni wanø mvsat pvngshì ráì.

Yalong svng mònggvn rvpdoq UN taqkèní gø vtoò nø 1999 nøng December 17 ni taq dvrá shvng mvsat shìráì we íe. Yani taq nø Dominican Republic móngdàn taq 1960 nøng Mirabal ang nvm mèla 3 mèsvng naqciq riqdø dvkiò nø shat yàngà we svng gø dvdam shì we íe. Nøng vrvm November 25 ni nvng svmaré, lvngàré rìtaq dvki vrè we dangrì vgámwe svmaré rìkaq dvki vrè we dang shvmáng lvm 16 ni døp nvngòn dvtanwe lìpùngrì vsvng mvngpòng mvdò rìtaq wáshì ráì.

Dvki vrè we wawe taq svmaré rì kaq mvnyamvm we, shatò we dø íwe màngrø rì vbá we íe. Wewa mvtaq màdu mà dvrádø shvngkà dvbungò we, tiqchøm vdòng mø:íni tiqdá vsvngrì dvhø màdu mà dvrádø mvnyamvm we rì shvngbe vbá we íe. Yadø dvki vrè we taqkèní shagóng svng shat we, zá dvzvŕ we nvng lvpat yànggùng taq nøt zá dvzvŕ we íe.

Yadø màngrø rì nvng dvki vrè we rì nø shiqshàn dang vnøn dvzvŕ we taq téwa vnøn dvzvŕ we gø íe. Svmarérì kaq mvnyamvm we, dvki vrè we dang svng vgám lúnlvm dvpat angmaq svng téwa tùbum dvbangā rànø angmaqò bøn mvyø we kàrì svng táā ràlonge. Gùn dvtøpwe rìtaq èyàngvtnò dvgvp svmaré rìsvng mvnyamvm we màngrørì nø dvrá dang taq vdu vbóng dø mvrà dam zíò we gvzà yúme wa nø shálún shìe.

Yadang nvng sing nø mvdøng vchyak wálún lvm shvdøm we íe. Dènibla bat taq gø yadø svmaré rìkaq dvki vrè we, mvnyamvm we dangrì gvzàni vl mvnshì we gø yánglún shìe. Yadang nvng sing nø vgám, shvzøm lúnlvm dvpat vsvng mvngpòng rì dvhø ang dvtang tang roqgvr kewe wá shì vdu vmì. Yadø mvnyamvm nø dvki vrè we dangrì svng dvrá róngrì dvrá jeyang lvm dvpat sakse rì gvza gùn dvtøp lvm vchyake.

Mònggvn taq yadø svmaré rìkaq dvki vrè we, mvnyamvm we rì gvzà vl we ínì gø dvrá upvdi vdòng taqnø roqgvr we dvrárì taqkèní chapdap waò we dang taq nvngòn yúmwe svng shálún shìe. Wedø írat nø mònggvn vsvngrì shvngbe taq kèní svmaré nvng svmarécèrì kaq dvki vrè we, mvnyamvm we tvrà svng shvmáng lúnlvm tasvng roqgvr kéì we taq dvzaq shàì.