Mònggvn svngpvn dvsháza àngni

Mònggvn svngpvn dvsháza àngni

Mònggvn rvpdoq UN taqkèní February 4 ni svng mònggvn svngpvn dvsháza àngni wanø mvsvt bøà nø weni svng 2021 nøng wàlvm dvkám bøà. We lìpùng taq nøng vrvm kámnøt tvrà rìnvng tóng laqyà dang vrashì lvm shvlae wanø tvnùngvtnà we íe. Arab Emirates móngdàn kèní gvsa rì í tvnùngvtnà we taq yanila vkøn ráì we Covid 19 zønli yalòng nø kámnøt tvrà taq rvwing we svng shvrvm shvráwe íe wanø vtànvtnà. Wedø íratnø shvngømré rì nvng kámnøt tvrà dang taq rvwìng we rìsvng shvrvm shvrá lvm mvdøng dvdamshì nø vra shì ràwe svng tvnùng bøà.

Shvngømrérì vdòng taqkèní svngpvn dvsháza we dang kámnøt tvrà shvngømré shølshúrì vhøm nø dvmvn we yáng kèní téwa síngshá lúnlvm vlu vdánrì gúnā lúnlvm svng dvdam shì we gø íe. Màbóng we tóng laqyà, kámnøt tvrà, shvngømré rì dang tasvng síngsháā ké lvm nø téwa vchyak we svng gø tvnùng bøà.

We dang taq àng mvdò dò rìí vtànò we dangrì svng gø vtoā lún lvm dangrì vbá we íe. Téwa paqzí zùng rìtaq kámnøt tvrà nvng singwe mø:íni shvngømré àng mvdò dò nvng singnø tasvng rvwìng we mv-vl lvm svng mvdøng dvkám we íe. Yadø February 4 ni nø Christian rì nvng Muslim mvdòrì dvhø tasvng vtoq vtip lvm dangrì taq gvzàni shvla dø dvbangā we àngni gø íe.

Al-Azharò dvrá vjì íyàngìpè Mohamed Mahmoud Abdel Salam shønwe taq yadø svngpvn dvsháza àngni svng wálún shì bøì wenø mvshøl taq jòrlvm tiqlòng íe wanø dvdamshì shvla we svng vtàn bøà. Mònggvn rvpdoq UN ò bvnlì àngkàng tiqgø íwe Salam shøn we taq Vatican taq vlwe Svrabín koqkám ò kàru bok nvng kámnøt tvrà shvngømré mvdòrì tasvng vzøm we, vtoq vtip we rìnø yani bønlvm svng dvbangā we íe wanø vtànvtnà.

Yani svng mvsat shìwe nøt vrá kàciqrì gvl bøà we mèpvng 2019 nøng August 20 ni taq gomvdi àngké mvdò svng gø poqpvng lún bøà. We gomvdi taq Christian, Muslim nvng Jú dvcìrì taqkèní poq bøà we íe. Tuqrawe February 4 ni mònggvn svngpvn dvsháza àngni taqnø Svrabín koqkámpè nvng Grand Imam taqkèní mònggvn svng svngpvn dvcìrì shvngbe vrvm vrá nø vzøm we àngni wanø dvshvng lvm svng UAE móngdàn gvsarì kaq vtàn bøà we íe.

#vatican

By. Gregory

Add new comment

3 + 1 =