Mònggvn vsak svrøng á:mì vsvngrìò angni

October 1 ni nø mònggvn vsak svrøng á:mì vsvngrìò angni wanø mvsat shì bøì we íe. 2020 nøng taq nø mònggvn rvpdoq UNò 75 nøng vhømwe nvng mònggvn vsak svrøng á:mì rìò angni 30 nøng gømráì nøng gø íe. Yanøng vdòng taq nø Covid 19 yóga zønlì vkøn we írat nø mònggvn taq mòngzøl lòng mvl á:mì.

Covid 19 yóga zønlì vkøn we rvtø taq vsak téá:mì vsvngrìò shiqshàn dang svng dvdam ã-ì we taqkèní angmaq taq rà vchyak we dangrì taq tùbum dvbang shì lvm tvnùngvtnàwe íe. Yadø zønli vgámì we rvtø taq vsak téá:mì we vsvngrì dvpat dang vrvm taqkèní dvbang shìlvm gvzà vchyak we íe.

Yanøng svng nø "Year of Nurse and Midwife" cìsvra maqrìò angnøng wanø mvsatshì bøì we íe. Yanøngò mònggvn vsvng svrøng á:mì rìò angni taqnø angmaq svng shiqshàn dang taq vsùngò nø dvbang shìwe shiqshàn dvprìò bvnlì svng gø gvzà vchyak we íá:mì we svng tvnùng vdu á:mì we íe. Ya 2020 nøng taq wáshì we lìpùng taq nø 2020-2030 nøng dvhø shiqshàn dang taq zìdang dvhàng lvm mvnggá dvlà 5 dang svng gvlshì lvm dvpat mvngpòng nvng UN paqzí vdèrì dvhø vrashì lvm wa bøà we svng shálún shìe.

2020 nøngò gvlshì we manggá rì Angcé mvzuq nøng dvhø vsak téá:mì vsvngrì dvpat gvlshì we shiqshàn lvm dvlàrì kaq svng shá dvzár lvm Vsak téá:mì vsvngrì nvng angmaq taq rà vchyak we shiqshàn lvm dang taq dvzømshì we nvng we dang nvng sing nø bvnlì rìkaq vtan lvm, Cìsvra svramaq rìò dang nvng síngnø téwa síng shá-ã lvm, Zìdang vháng á:mì móngdàn rìnvng vháng mvnshìwe móngdànrì dvhø shiqshàn dang zìdang vsvr we svng shvyúm lún lvm Covid 19 yóga zønlì nvng sing nø vsak té á:mì vsvng rì kaq kadø wa roqgvr ãlvm dvlàrì gvl lvm manggá svng gvl shì we íe.

Yani bøn ráì we mvshøl Yani svng mònggvn rvpdoq UN ò 1990 nøng December 14 ni zupùng taq mònggvn vsak téá:mì vsvngrìò angni svng October 1 ni taq walvm mvsat yàngà. 1991 nøng taq nø weni taq cvnlvm dvrárì gvlshì lún yàngà. 2002 nøng tuqráì kat 21 angyá mvzuq nøngò nvmlat boq vsak terì svng vsùnglvm lìpùng svng wálún bøànø welì pùng taq angmaqò lvpat yanggúng cúnshì lúnlvm nvng vsvngzìdang vháng lvm wawe kà vgo taqkèní Madrid tvnùng kàru svng dvkang bøa we íe.

Yadø wàò we taqkèní mònggvn vsvngrìò cúnshì lúnwe lvpat shiqshàn dang téwa yangdø vtoshì lúnvtnà we svng gø yánglún shì ráì. 1950-2010 nøng dvhø mònggvn vsvngrìò lvpat nø 46-68 dvhø vlwe ínø 2019 nøng taq nø vsak 65 nøng mvdàm cúnshì lúnò we vsvng 703 million gø høq shaq vháng mvnshì ráì we svng shálún shìe. Wedø íwe taq Asia móngdànrì vdòng téwa luq we svng gø shálún shìe.

Yadø lvpat yanggúng cúnshì lúnlvm svng Africa nvng Asia móngdànrì taq 2019 nøng taq 29 million vl we taq kèní 2050 nøng taqnø 96 million høqshaq vháng longe wanø gø dvdam shìwe íe. 2050 nøng vdòng taq nø 65 nøng mvdàm lvpat yangnø cúnshì lúnwe vsvng 225% høqshaq vháng mvmshì longe wanø tvnùng bøa we íe.

#UN