Mònggvn yvmbvn bvn we vsvngrìò angni

AD 2000 nøng December 4 ni taq wáshì bøìwe mònggvn rvpdoq UN ò lìpùng taq mònggvn móngdànrì taq yvmbvn bvn nø bvnlì wavm we vsvngrì ò lvpat rìsvng dvdamā we taqkèní December 18 ni svng Mònggvn yvmbvn bvn we vsvngrìò angni wanø mvsat shì bøì we íe.

1990 nøng taq nø we mònggvn móngdànrì taq yvmbvn bvn we vsvngrì kaq roqgvr lvm dvrárì svng gø International Convention kèní mvsat dvkám shaq íe. 2006 nøng September 14-15 ni mònggvn rvpdoq UN lìpùng taq àngmaqò lvpatrì vhánglún lvm nvng singwe dang vrangshì we lìpùng taqnø mvlúm móngdànrì 132 móngdànrì taqkèní vhømnø nøt vrá bøì we gø íe.

Kàciq vshøm lòng taqkèní vhømnø vrashì weínø kàciq 1 taq, mònggvn móngdànrì vdòng taq yvmbvn bvn vsvngrì tiqni mvdàm tiqni luq mvnshì ráì we ínø wedø yvmbvn bvn vsvngrì kaq àngmè móngdàn kèní gø angmaq tuqrawe móngdàn taqkèní gø tubùm dvbangā lvm, kàciq 2, àngmaqò svngpvn vko vkáng rì svng vpø shvringā lvm mvtaq lúnkángrì taq gø zílún nø dvbang shìlvm lvm gvzàni vchyak we dang, kàciq 3, tuqrawe mònggvn yvmbvn vsvngrì nvng singnø vní móngdàn dvhø møíni mònggvn zìdang ku vtoq vtip we dangrì téwa shv-ngáng lúnlvm wawe dangrì taq nøt vrá kàciqrat bøà we íe.

Mònggvn yvmbvn bvn vsvngrì taq dvshà mvhøt lvm, vzi vrùng wawe, svngpvn vko vkáng rì mvlúnò we nvng dvki vrè werì vhømòe. Yadang nvng singnø angmaq lvpat rìsvng shønløm dø roqgvrā lvm dvpat móng lvmang dvlà tiqlòng ku wáshì ràwe svng vchyàng bøà we íe. We lìpùng svng Belgium móngdàn vsúyaq taqkèní chøm angkàng ku vtoò nø lìpùng taq shølshú wáshì bøì we íe.

2006 nøng we lìpùng mèpvng kèní nø mònggvn móngdànrì taq yvmbvn bvn nø bvnlì wavm we vsvngrì tiq nvmsháni vhángnø luqmvn shì ráì we svng yánglún shì ráì we mvtaq vsúyaq nvng vzøm we dangrì taq gø téwa shvla dø vzøm vzap lúnshì ráì we svng yánglún shìe.

Vránø 2018 nøng Marrakech myoq Morocco móngdàn taq wáshì bøì we lìpùng gvbà taq nø mònggvn døng nvng singwe nøt vrá kàru tiqlòng svng nøt vránø gvl lún bøà we íe. We nøt vrá kàru taqnø mònggvn yvmbvn bvn we vsvngrìò vko vkángrì, àngmaqò dvgùngrì, nvng angmaqò lúnkángrì svng dvbangā lúmlvm dang taq móngdàn, móng wvlrìò døngjá vmíng vkáng nvng singwe tvnùng kàru tiqlòng svng wálún bøà we svng shálún shìe.