Mònggvn zìdang vhángwe shvngkà shìpvn vtàn we angni

Mònggvn taq vtoq vtip we phone SIM card tiqlòng svng dollars 1500 dángte vpø we íe wawe la ínì nø nà dedá shì yalòng svng na kámlvm yak lone.

Ínìgø wedø íwe tvrà 1995-2005 nøngrì dvhø vdè Myanmar móng taq bøn bøì we svng yánglún shìe.

We rvtø taq we lòng phone SIM card nø gvzà chá vle vpøe wanø mà dvdam yàngshà.

We sim card rìnø pindap rìnvng svté mvgàmrì dvpat wa íe wa dvdam shì yàngshà.

Yadø sim card rì chá vle dvpø vhángwe nø móng lvmang nvng gø singwe svng yánglún shì we íe.

Yani la taq nøng maq gø vrvm phone sim card rì lángshì ráì kat wa yadø vtoq vtip shì lúnwe nø kadángte zømdàng nø vchyak we svng síngshá-atshà.

Digital kèní vtoq vtip shàì we bat taq shvngkà rìnvng paqzí paqrat rì dvtit tvle kéì we taq yul yùl cè wálún shì ráì. Yalòng nø vsvng màngpongrì dvhø zìdang vháng ráì we rat íe. Yadø íwe dang svng mvcán shì we móngdàn rvgaq rìnø pangkrat nø mepvng kaq ngámshì lvm wa ílonge.

Mvjò dø shvngkà rìnvng vtoq vtip shìwe nø bvnchvtrì svng dvbungòe. Wedø írat nøng maq svngbeí vtoq vtip shìwe dang svng shvla we tvrà kèní láshì ràwe svng síng shá ràe.

October 24 ni svng mònggvn zìdang vháng we vtoq vtip shvngkà angni wanø mvsatshì bøì we taq nøngmaq dvhø vtoq vtip lúnì we svng yani taq nøt mvsøn kèní døm shálvm shvdøm we íe.

1972 nøng taq yani svng mònggvn rapdoq UN zupùng taq mvsatshì yàngì we ínø yani taq mònggvn móngdàn vrvm zìdang vháng lvm dang nvng sing we bvnchvtrì svng mvngushì nø bvnlì wawe svng téwa dvzaq shì lvm vchyak ráì.

Welòng zupùng taq October 24 ni nø mònggvn rapdoq UN angni nvng tiqni vdòng wá vdu we svng dánshì nø mvsatshì bøì we svng shálún shìe.

Yalòng nø shvngkàrì nvng móng dvcìrìò dvdam shìwe manggá rì svng làngré rìkaq téwa dvtú lúnlvm nvng shádvzit lúnlvm dvpat wáshì we íe wawe svng shálún shìe.