Mònggvn zìlàngré angni svng 2023 nøng taq wàlvm dvgøshì we shvngkà

Mònggvn zìlàngré angni svng 2023 nøng taq wàlvm dvgøshì we shvngkà

2023 nøng taq walvm mònggvn zìlàngré angni svng dvgø shì we Portugal móngdàn kèní làngrérì svng we dang nvng singnø vra shìlvm lìpùng kaq 2 ni tøp vrashì lvm dvkám bøà. Yadø dvkám bøà weò manggá nø wemóng taq wáshì lvm lìpùng taqkèní mòngzøl lòng vtoshì lúnlvm dvpat dvdam shìwe íe wae. Yani svng November 28-29 ni taq wáshì bøì we gø íe.

Dèni bat taq làngrérì gø vrvm nø angdè shagóng dvkúmshì we bvnlì dvzaq shàì we dø tiqdvchá dvbùshvng bvnlì dang taq gø dvzaqshì ràwe svng shvdøm bøà we íe. Mònggvn zìlàngré angni nvng sing nø Svrabín koqkámpè Francisí nvngòn ziwe mòngkà taq Luka lèga taq vru we Mariqí angnvmmè Elizabeth svng tung dinø dvhømò we chømciq taqkèní nvngòn ziwe íe.

Yalòng tvnùng kàru nø 2019 nøng kèní dvkám shaq íbøì we íe. Yani la Covid 19 yóga zønlì vkøn we rvtø taq tiqgø nvng tiqgø nø nvmbøng tvrà kèní wa vtoq vtip shàì we ínø angdè gùr gùr shvnvng rì taq vlwe dvshà mvhøt vsvngrì kaq svng gø dvsháza shóngnøtí tùbum dvbangā kélvm svng gø dvkám bøà we íe.

Dvbùshvng bvnlì dang svng nø shøn mvtømshì høqshaq luqwe ínø làngrérì kaq wedang nvng singnø angdè èvl we shvrà rìtaq chvpdap dvzømshì lúnlvm dvkám we íe. Làngrérì kaq yani la vkøn we zønli dvjáng yalòng vgám we dangrì taq dvzaq shìlvm dvkám we gø ínø we dø dvzømshì we rvtø rìtaqø 2023 nøng mònggvn zìlangré angni dvpat dvkangshì bøì we bèlaq svng gwashì lvm, yalòng nø tuqrawe ya lìpùng mè dvpat dvdam shì lúnlvm dvpvt dvdam shìwe íe wanø dvkám bøà we íe.

2023 nøng mònggvn zìlàngré angniò dvzik nø wurgáng vzàng lvpø angmè mariq cømla vbáwe ínø Portugal móngdànò dùngkun cvmlàng nvng mvnshì bøì we íe wae.

Yalòng bóymè dvzik svng móngdàn 30 kèní krønmvngrì taqkèní rvsvng bøà we Lisbon kèní Beatriz Roque Antunes tøshì we tiqpè kèní vru bøà we íe wanø shálún shìe. Yalòng mònggvn zìlàngré angni svng 2023 nøng taq Portugal móngdàn taq wàlvm íwe svng Svrabín koqkámpè Francisí 2019 nøng kèní dvkámnø vring shaq íwe íe.