Mònggvn zaqlèwàng angni

Mònggvn zaqlèwàng angni

Mònggvn zaqlèwàng angni svng September 27 ni taq nøng vrvm wáshìwe íe. Yaniò tvnù mangá nø zaqlèwàng bvnlì nvng svngpvn bvnlìrì, tóng laqyàrì, móng lvmvng nvng wulaq bvnlìrì dvpø zømdàng we nvng singnø mònggvn svng dvtan nø dvshá dvzit lún lvm dvpat íe. Yani bøn ráì mvtúnø 2030 nøng tuq rakat mònggvn zìdang vhánglún lvm wawe dvlàrì taqkèní kàvgo tiqlòng íwe zaqlèwàng bvnlì gø zìdang vháng lún lvm mangá tiqlòng íe. Mònggvn zaqlèwàng bvnlì taq dvzømshì vsvngrì, ya bvnlì ngàngdøng nø dvhàng lvm bvnlì døngjári we vsvngrì taqkèní September 27 ni taq kømngúm mvngushì lvm vrìngvtnà we íe. Mònggvn zaqlèwàng angni vrangshì we 1980 nøngò UNWTO zupùng taq kèní mònggvn zaqlèwàng angni svng mvsat shìbøì we íe. Weni nø mònggvn zaqlèwàng bvnlì dvpat gvzà vchyak we angni tiqni íbøì.

       Yani nø UNWTOò 1970 nøng September 27 ni taqkèní tvya shaq íwe angni tiqni svng shvdøngvtnà we gø íe. Vle á:mì we 60 nøng kaq nø zaqlèwàng bvnlì wawe taq àngpvn pvn vzìng yàngì we svng yánglún shìe. Yalòng nø mònggvn wulaq bvnlì taq gvzà vjú ziwe bvnlì tiqlòng gø íwe svng yánglún shì ráì. Mònggvn zaqlèwàng di we vsvngrì 1950 nøng taq 25 million vl yàngì we taqkèní dèni 1.3 billion høq vlráì we ínø móngdàn shvng gvmsùngrì gø 1950 nøng vdòng American dollar 2 billion kèní 2015 nøng taqnø 1260 trillion høqshaq gòngwe svng shálún shìe. Yalòng nø mònggvn GDPò 10 wál 1wál íwe svng shálún shìe. Wedø írat nø ya bvnlì nø mònggvn bvnlì té vtang 10 lòng kèní 1 lòng íe wanø gø shøn lúnshìe. Mònggvn zaqlèwàng bvnlì nø 2030 nøng høq 3% ku vháng mvnshì longe wanø gø dvdam lún shìe. Yadø zaqlèwàng bvnlì vháng mvnshì ráì we nø téwa nvmbøng tvrà zidang shvláráì we rat nø íe wanø gø shønlún shìe. Mònggvn svngpvn vko vkáng tvnùng kàru svng vpø shvringò we nvng tvmø bvnlì wavmrìò lún vdu we vko vkángrì vdu vbóng dø lángshì we taqkèní gø yalòng bvnlì svng shvla dø tubùm dvbangshì ráì we íe. Yalòng bvnlì nø yadø mònggvn taq dvjáng zønli vkøn we mvl dángte høq shaq pvngyàn vháng mvnshìe wanø gø shálún shìe. #source:UN