"Magāū dvbùshang sasvna wà India shvrúngshú tiqpè í Nēbyē taq zidvng vháng we zong tiqzong poqlvm rvt mvnggá gvlō we "

"Magāū dvbùshang sasvna wà India shvrúngshú tiqpè í Nēbyē taq zidvng vháng we zong tiqzong poqlvm rvt mvnggá gvlō we "

   Magāū taqø dvbùshang sasvna wàwe India móngdàn kèní Glayrecian shvrúngshú tiqpèí Nēbyē taq zidvng vháng we zong tiqlòng poqlvm rvt dvgø'shìē.Shvrúngshú pè bøng nø Jojo Peter Ancheril wa tø'shìē. Yalòng tvyø svng dvnúng lúnlvm dvpvt àngò dvbùshang sasvna rvmnvngrìò jèjúrì rvt (2015) nøng, nvmnø'ng wàbø'ì mèpvng wā pvngshíbø'ì.Nvmnø'ng wà bø'ì mèpvng wè rvgaq svng dvríshì nø dì weí yvng bøā. Nvmnø'ng vnvnshì we dām svng mvmè vhøm bøā we.Chitwan kvyai Wasbang mvring svng vrá tiqkvt dvbúng nø dēshì we taq dvbàng bøā we íē. Wè kayai nø Nēbyē móngdànò rvwe dung tut taq vlē. Angpè angmè mà-dá Dvrvtce tiqgø'kaq svng tubùm dvté yv'ngkèní nvmlat pvngshì lúngì wàe.

 Dènila taq shvrúngshú pè nvng àngò dvbùshang sasvna mvdò ínø zongmang(400) jvn gø' svng tubùm dvbàng weí Paqzí rì cvnàòē. Tuqdaq we (2025) nøng vdòng taqnø zongmang (900) gø'høq vtōlvm rvt dvdvm nø dvnúng shìe. (2030) taqnø zongmang (2000) gø' taqkèní (3000) gø'høq í ràe wanø dvdvmōe. Dvbùshang sasvna mvdò nvng nøntlømrìò jèjúrì rvt tubùm dvbàng weí bønlvm lòng svng gø vlømshìe.Yalòng zong svng Nēbyē kèní móngdàn vrvm taq zidvng vl we zong tiqlòng ku gvl mvyø we dang, yalòng mvnggá svng dvnúngà we shvrúngshú pè nø lvpat (49) nøng wā vl tiqpè íē. Yà zong nø mvkøm mvzup we zongmang rì, cvmré Paqzí dang dvpvt dvshà we døngkurì dvpvt gvzà vjú zílúnlvm ídaqe.

 Cvmré (400) gø' taqkèní dvrvtcerì, dvsháhoqrì, hí-wur mvkøm mvzup rì gø vlē. Wè cvmrérì dvpvt vl lvm shvra svng (may 13,2017) taq wà yangà. Yalòng zong svng wáshì we nø vlún vkang mvmè cø'm we dvshà we cvmrérì, vrúm vcār rvgaq kèní dí rvzaq we cvmrérì dvpvt mvdøng dvdvm shìe.(April,2,2015) nøng taq nònggùn (7.8) nònggùn vl we nvmnø'ng tiqlòng wà yangì. Vsvng gorø (9) kyíng mvdvm lvpat cø'mbø'ì nø, (2.8) wvn dvgøqshì ra chøm màdá vhøm bøā we mvdvm, nī vrvm lv'ngrà rì dang taqgø yvk we vhøm yangà.
Móngdàn tø'ngtá:ngò tubùm dvbàng rì gø gvzà shvlá lúngì. Yà cvmrérì vllvm chøm svng gø nvmnø'ngò shiwvt rvt íe. Vkvt rvtø cvmrérì kaq tùbùm dvkùm dvté lvm chøm ( Gēha ) nø tuqdaq we zongmangcèrì kaq lvpat àngshvr taqø vháng vlúnlvm, wá lúnlvm rvt nvng tvndvgáni dvpvt vlømshì rà mvtúrì svng vrvngà we íē.

 Nvmnø'ng wàbø'ì mèpvng shvrúngshúpèo dvbùshang sasvna mvdò ínø chømgung (100) svng wáālvm rvt kàciq gvl bøā. Vkvt dø chøm (23) chøm vrvng nø wá dv'ngbø'a we vdòng yv'nglúnshì we taq, wè shvra nø tuqlvm yvk nø, nvmnø'ng shiwvt rvtø lvngcha taq angpè angmèmaq nø, wè cvmrérì kaq svng Sasvna àngké rúng kaq shø:lō nø dvgoqshìē. Nvmlat wàl taq døngku tiqlòng taqkèní dvbúngshìlvm rvt (10)(20)(100)(200)(300) kèní døngku nònggùn rì rvmshì lúngì. Yalòng dvja svng pvrvnà we pvnglvm rvt vlu lá we kàru gømrì kèní Magāū taq nvmlat pvngshì lúngì we dang Sasvna mvdò kèní Catherine ì vkvt dø pø'nòē.Shvrúngshúpè Ancheril nø wè zongò zongøp pè ínø nēbyē taqø àngí dvnúngò we tvyø svng àngmaqí shøn daqā, àngmaq gø vbá bø'ì rvt shvrúngshúpè taqkèní gø oqā wàkà shøn weí nēbyē taqø dvbùshang sasvna wàlvm  tvyø taq vbá lúngì dang svng gø vkvt dø shønòe.