Mexico taq Catholic rvzvng vjúrøt dì we zaqle (13) gø' shì bø'ì we shvngkà

"Mexico taq Catholic rvzvng vjúrøt dì we zaqle (13) gø' shì bø'ì we Shvngkà"

Mexico móngdàn taq January 29 ni taqø Catholic rvzvngce vjúrøt shì dì we zaqlerìò mōdō vku:p nø vsvng (13) gø'shì bø'ì we dang Catholic Shvngkà Agency taqkèní dvtánò we taq yvnglún shìe.
Vjúrøt mvdò nø mexico móngdàn Jalisco byēnē, San Juan de los Lagos taq vl we Virgin of La Candelaria sømla hvng svng yv'ng nvng dì we dang, Vkvt dø dvchvn dvnvn bønā:mì we taq vsvng (10) gø'gø dv'má lún bøā we dang shálún shìe.1623 nøng taqø jór pòngbang dvtánò dvgvp bøn bø'ì we tvrà taq jór pòngbang dvtánò we rvtø taqø mv-rà mà-vl we Gvray angmè Mari sømla hvng yvng mexico móngdàn kaq vjúrøtshì we vsvngrì nøng vrvm (1) wvn jvn dì nø vjúrøt shìe wàe.

Dālvm tvrà mvbøn

Àng vtong vl dø gvn yà gvn-shinò àngcè me nø àngí dvnúngò we vdòngø mà-dvdàmshì chvn vnvn shi bø'ì we rvtø taq angpè angmè maq nø nønt yòr nø àngmaqò àngcè me kaq svng San Juan ò Noqngøm zong svng shøl lúngā. Noqngøm zong vzúngshúpèò døngku me i àngmaq kaq svng shànshér we Gvray angmè Mari kaq svng vjúrøtlvm rvt dvkvmòe. wē mè kaq svng laqtù:ni tø:pmò nø vnang lòng svng Gvray angmè Mari sømla hvng shvnvng yv'ngø gvlō dvgvp wè mecè nø a:ngvtshì lúngì nø cúnlúngì, yà lòng mvbøn nø kayvng màyvng tiq dvshaqí vshérá:mi nø mexico nvng American Byīdōngsuq tiq rvgaq svng gø vshérá:mì.

Sømla svng San Juan de los Lago's ò Basilica Minor yv'ng gvlshìe. January shvlá bé lúngì lap taq kayvng màyvng kèní vjúrøtshì rì nø tiq lvban dvrá shvdik shì bø mèpvng a:tyawng sòng svmi rì nvng mv-kun zaywa cèrì taqkèní shvring shvta nø dvgung zíò we dang shálún shìe.Mexican Svrado rì Nyilakvn " mexico byinē Toluca kèní vjúrøtshì mvdò nvng tiqdø vsvng tōò we mōdō tiqchvng vkup rvt mà-vl bøì we angri angrvprì nvng tiqdø vjúrøt dvbvng we dang January (26) ni taq dvkvngò we kàru taqkèní shálún shìe. " Nøngmaqò vpè Gvray nvng Gwàda Lùbe shvrà taq vl we Gvray angmè Mariò ìshøt igvn rì vtōshì lún nø nà kaq svng roq leq gar" wanø svradopèò dvkvng we mongkà lvngdøm taq dvdøm bøā we íē.