Mogok Jau Gwørwang yvng Shvrúngshú Wajau àngshvr vtō we bóy wà bøā we Shvngkà 

Mogok Jau Gwørwang yvng Shvrúngshú Wajau àngshvr vtō we bóy wà bøā we Shvngkà 

21 march 2023 nī Vsháng (9:00) am rvtø mogok Jau Gwørwang Padang mvring kèní St.peter nvng St.Paul Noqngøm chøm taq St.paul shvrúngshú mvdò kèní shvrúngshú Fr. Stephen labang naw tawng svng shvngømré rvzvngcerì nvng mvring vsvngrì taqkèní  dvbù nøntni vtō bø'à we íe.

Oqā wà Missa Noqngøm rvtø svng shvrúngshú àngshvr taqkèní shøl nø shvrúngshú rì (6) gø' , dvzømshú Mama rì (13) , Brother rì (6) gø', shvngømré rvzvngcerì shvngbe (600) jvn rvzé kømngøm nø vjúrøt we bvnlì svng wà bø'à.

Shvrúngshú pè Wa Jau labang naw tawng nø mogok Jau Gwørwang, Padang mvring kaq lo nø, vlē a:mì we march shvlá 18 ni taq Jau vya Sacramentu) kvmshì bø'ì nø, àng vpvt we bvnlì døngjá nø Svrado gvbapè Cardinal Charles Boò bvnlì àngkang ku dvzaqshì lvm rvt bvnlì shvrì we vtōshì lún bø'à.

Shvrúngshú pè nø àng lvpat (10) nøng mvlim taq angpè angmè ní shíà yà:ngà nø angnvm me nvng dvshá dvre vl yangì we svng shálún shìe.

Angnvm ní svng dvkum dvté rà rvt lvpat cv'm we íni gø mogok shigung kaq dì nø lú:ng lá we, tiqdvr vsvngrì taqø bvnlì wà nø dvkum shì yangì we svng shálún shìe.

Yvklvm tvrà angpvnpvn rvt zong gø (4) dán óng wèò Paqzí zong gø nár vdù yangì. Vkvtdø Paqzí zong nar vdù we íni gø wè rvtø Gwørwang øp Wajau Athar-hpa í shølò nø Paqzí zong vrá dvtut lúnglúnò rvt, vkvt dèni mvngsher we shvrúngshú tiqpè í bø'ì.

Vnvmchvngmaqe, dālvm jèjú ínø nøngmaq shvngbe shvbóng shvmvtshì nònggùn lùshì ra íe.
Nøngmaq Shvngbeí shvrúngshú Wajau àngshvr dvpvt vjúrøt dvbvng sórí zilàngrérì Shvngbeí gø Wajau svng yvng nø Gvray gvsang bvnlìrì taq dvzaqshì laqlúni wā nònggùn zí e.