Monggvn tòniò dvjáng zønlìrì svng vgám we angni

Mònggvn tòniò dvjáng zønlìrì svng vgámwe angni svng 1989 nøng mònggvn rvpdoq zùpùng kèní mvsat shìyàngì we íe. Dèni October 13 ni taq wáshì we yani taqnø mònggvn vsvng shvngbe dvhø tòniò langcha dvjáng zønli rìkaq vgámnø shvyúm lúnlvm dvlàrì gvlshì nø shá dvzitwe lìpùngrì yadø shìwvt vhømò vsvngrì kaq tubum dvbangshì we rì waò we angni tiqni gø íe.

Yadø mònggvn nvng singwe lìpùng angnirì wáshì we ò mvnggá nø tasvng shá dvzitwe bvnlì rì wá lúnlvm, mònggvn nvng singwe bvnchvtrì pvran lúnlvm, tasvng vpø shvring kelvm nvng tùbum dvbang kélvm dvpat íe. Yadø àngnirì vl nø wáshì weí mònggvn rvpdoq UN svng téwa vsvngrì kaq tiqnøt tiq mvyùng wá dvzvŕ we gø íe.

Rvgaq yachàng mvdàm nøng vrvm dvjáng shiwvt angpvn pvn vkøn weí vsvngrì kaq dvshá mvhøtwe vhøm dvzvŕe. Ínìgø yadø íwe tvyørì vlwe taqkèní bvnchvtrì shvyúm lúnì we íe. Unesco mvdò taq kèní yadø íwe shìwvt dvjángrì kaq roqgvr we bvnlì svng wáshì we gø íe. Tòniò shìwvt pvnrì wawe taq tì, nvmbøng, dø íwe tòniò pvnmán dvrèrì taqkèní angwa bøn ralòng íe.

Wedø bønwe rìkaq shvyúm shì lúlvm dvpat nøtsun paqzí vdèrì taqkèní gø gùn dvtøpnø dvzaq dvkáng shì mvbat wáshì we íe. Yanøngò wáshì we kà vgo taq tòniò shìwvt taqkèní gvyaqshì we vhømò rìkaq tùbum dvbang shì lvm, 2030 nøng tuq rakat pazí dang shiqshàn dang nvng singwe dvrèrì kømzøpdø dvgøshì lúnlvm wawe kà vgo rì taqkèní wáshì we svng yánglún shìe.

Wedø vchyak we chøm, tøngnø rìsvng wa lvm, dvcøpnø roqgvr lvm wáshì we gø we shìwvt svng vgám nø shvyúm we nvng vbóng we íe. Téwa rvgaq vdøl we, tì tøng we taq vsvng shìwe gvzà luqwe ínø yadø íwe taqkèní lutshì lún lvm dvpat cvndøng dvrárì, cìrúng chøm rì gvlnø dvgø shì rawe svng tvnùng bøà we íe.