Muqlang dvzvr í Vmè Màriq kaq dvkvmò we àngni rvtømè taqø Svrabín koqkvm Francis í Missa Kagvp vdòng mongkà dvshvngò we

"Muqlang dvzvr í Vmè Màriq kaq dvkvmò we àngni rvtømè taqø Svrabín koqkvm Francis í Missa Kagvp vdòng mongkà dvshvngò we" Svrabín Koqkvmpè Francisí nø vlēá:mi we march shvlá (25) ni taq St. Bacílíca Noqngøm chøm me vdòngø ' muqlang dvzvr í Vmè Màriq kaq Mongkà dvkvmò we bóy' Missa Kagvp núng we rvtø svng shølò nø wà bøā.

"Missa Kagvp vdòng svrabín Koqkvmpè ínø mònggvn døngtang taq vl we svrado rì, shvngømré rvzvngcerì nvng tiqdø vkvt rvtø taq nøngmaq í vhømì we àng dvja svng gvzà mv'ngsher we Vmè Màriqò nøt mvsøn kaq vp tvle shvgùn weí nvmlat pvng nø wèni bóy àngniò rø vdù we dvbùshang mongkà svng lvngpvng rām taq dvtán shì dø mongkà svng dvdàm nø dvtit tvle dvshvng bøā."

Muqlang dvzvr Gabriel nø Vmè màriq kaq vshøm baq Kà shøn yangì. Nvmlat tiq baq taqø" jèjú nvng dv'n zø'ng mè, Gvray nø nà nvng tiqdø èvlē mè, debu" pàmvrà wànø shøn yangì. (Luka 1:28) dvbù lvm ra íwe àng mvtú nø" Gvray nø" Vmè Màriq nvng tiqdø vlē walong íe.

Vpø íwe vnvmchvngmaq muqlang dvzvrò pàmvrà wàkà nø namaq kaq svng gø shøn Kà íe. Namaq nø gvrayí mvrà chu:tna we vtoshì èlún nøng dvgvp yalòng pàmvrà wàkà nø namaq svng pàmvrà wàkà íe, wanø nàtōshì nøng.Wekvt 'Gvray' nø ngà nvng namaq tiqdø tvp v-lìe, wànø namaq kaq dekvm lúng nøngè.

Tiqlvng màle nøngmaq nø mvrà vroqshi we sacramentu svng vtōshaì nìnø Gvray kaq vnvpshìe wànø nøntshøm we yadø íwe kūngà shaq vtoshì lúnlvm vlē. Mvdøng nø mvrà vroqshi we sacramentu svng vtōshì lòng nø Vpè Gvray kaq nøntshøm dvbù dvzvr lòng íe. Nøngmaqò mvrà cvm we te we mvdvmø Vpè gvrayí vroqā lúnlvm lòng mvng nø gvzà vpø ra we íe. Dedàmò.

 jèjú nvng dv'n zø'ng mè, Gvray nø nà nvng tiqdø èvlē mè, debu" pàmvrà wànø shøn yangì. (Luka 1:28) dvbù lvm ra íwe àng mvtú nø" Gvray nø" Vmè Màriq nvng tiqdø vlē walong íe.

Lvmà ladvng nøngmaqò mvrà nø sacramentu vtōshì longò mvdøng zoqshi íni nø mvrà vroqā lún we, vtoshì mvlúnì nø nøngmaq mvdvm, nøngmaqò nønt mvgør we, nøngmaq nonggùn kūngà dvkvng shàì we, nøngmaq vzàqshaì we mvtú mvdvm taqwā jøngjø'ng vlvm íe. Wè dø ba:tut mø-í.

Sacramentu nø Gvrayò àng bvnlì dang íē. Gvrayí nø nøngmaq kaq svng lutshi lúnlvm vmíng vkvng lòng svng zìe. Nøngmaqò hí mvdvm taqø nonggùn kūngà shaq taqkèní dø:ngvng dø rìp dvzá:rē. Ìshøt igvnò mvdøng ílòng svng dvdvm laq rø:nì. Zø'mcaq lòng nø nøngmaq kaq Gvray nvng nitvp dvzvr lòng nø mø-í wè svng síng shá ràe.

Gvray nø Nazaret chøm me kaq svng dì pàdø nøngmaqò chøm rì kaq svng gø dìe. Nøngmaqí mà dvdvmi we jèjú ìshøt igvn rì shemvnà íe. Nvmlat tiq wál taq Gvrayò dang svng yvngì. Wekvt wā mvrà vroqshi we sacramentu svng vtōshì we taq dìngman dø vpø shvring lúnlvm vlē. Nønt mvsøn vdòng taq tiqkvt shøq we, Pvlàcè dang tiqkvt àng shvr wáshì we yadø íwe dvja rì shvngbe nø gvrayí vroqā we yv'ngkèní pvngshì nø nøngmaq ra í we íē.

Yalòng Sacramentu lòngí nø dvbù nø byōlvm lòng svng yv'ng dvzvr weí shá lúnlvm rvt íe. Shvraq màchaq íwe nøngmaqò mvrà rì kèní lutshi lúnlvm rvt gø íe. Shóngshøng we vnvmchvng shvrúngshú rì namaq nø mvrà vroqā wèò dvzømshú rì èínøngè. Welòng mvrà vroqā wèò jèjúrì svng vtōshì lúnlvm rvt namaq kaq vnvpshì ra rì kaq svng 'debù nøng. Gvray nø Namaq nvng tiqdø vlē' wànø byōlvm lòng svng deshérnøng nø èzínøng. Namaq nø dvshá zā we kaq svng góng lúnlvm rvt pvngkà me íwe mvrà vroq Sacramentu svng gwádø ètánshì nøng.

Shvla we Vyvngroqshú dø cvndvgøm lúnlvm rvt go we svng vtōshì èlún bø'sha. Nøngmaq nø Vpè Gvrayò dvshá zā we shóngnønt bál we nønt mvsøn rì kaq svng dvciq lvpat gønshaq tíwang shvyúlà we ìshøt jèjúrì ríā we tìgkùng gvba rì íshàe.