Mvzáng ang dvpø télúngì wenø Myenmar móngdàn taq vlwe tvmø bvnlì wávm we làngpvng shvle vsvng rì dvpvt yakwe íe, wanø WFP World Food Program kèní dvtvn we shvngkà.

Mvzáng ang dvpø télúngì wenø Myenmar móngdàn taq vlwe tvmø bvnlì wávm we làngpvng shvle vsvng rì dvpvt yakwe íe,

wanø WFP World Food Program kèní dvtvn we shvngkà.
********************************************************************
Mònggvn vnà zinlì yógà rvtnø dvshà vhømò we Myenmar móngzøng dvshà we vsvng rì dvpvtnø ànã tøl bøà we February (1) nì taq kèní mvzángrì nvng jaksó

dvpø vni dvtvng vháng we rvt mvhøk rvmè dvshá we svng vhømò we wanø ( mònggvn rvpdoq mvzáng mvdòí) march (16-2021) nì taq dvtvn bøà we íe. 

February (1) yaq taq kèní móngzøng cèrìí rvsvng bøà we vsúyaq ànã svng tøl dv:ngí, móngzøng cèrìò shølshú Daw Aungsán Suqgyì svng tvp bøà mepvng

móngdàn vdúng taq mòngzøl lvm mvlwe íe. Ãnà tøl bøà we Pìn rìsvng vgvm we, vmíng mvcvnò we dang taq kèní wulaq bvnlìrì nvl bøà høq íwe íe.

Mvzángrì tòòwe dvrèrì vgvmò rvtnø mvzángrì nvng jaksórì dvpø vháng we svng bøn dvzvl we íe. Wervtnø tvmø rvmá bvnlì wávm we làngpvng shvle

vsvnrì dvpvt yakwe íe wanø, mònggvn rvpdoq mvzáng mvdò kèní Myenmar móngdàn krø:màng gvsa Stephen Andàsiní lvbán(2) nì taq shøn bøà we íe.

Covid-19 vna zìnlì vkøn wegø gvzá vháng nø, dvrè dvpø rìgø vzang dvtut vháng mvn shì nìnø ànà tøl bøà we svng vgvm rìgø yak vtvng we vsvng rìnø vmlvm

, aqlvm té yak wesvng vhøm lvm wa íe. Mònggvn rvpdoq mvzángrì Agencyí February shvla kèní yangong wamà vrvm taq vmsó dvpø 20% vháng nø,

mvndalay yvng nø vmcøp dvpø 4% vháng nø, kachin móng wamà rì taqgø vmcøp dvpø 35% dvngtè vháng nø, móngdàn vdúng vrvm taq jaksó dvpø 15% ínø,

yakày taqnø jaksó dvpø 33% ínø, vmsó dvpø nø 27% dvngtè vháng we svng shá lún shìe. 

Wedø ni mvzángrì, jaksó dvpø rì vháng mvn shìnìnø Band bvnlì rìgø nvl lvm, Gvmsòng tvlè we bvnlìrì yúmnø Gvmsòng lúnlvm zìdang gø yúmlvm wa íe wanø, Andàsiní shønòe.

Vránø angì yarvtø taq bønwe móng lvmvng vzàng taq kèní Covid-19 vna zìnlì vkøn we rvtnø jak rúngrì bat bøà we, zaqle diwe tvràrì vgv:mò we rvt dvshawe bvnlì

wáshú rì bvnlì mvlún bøà we íe. We mvdvm dvgá móngdàn kèní gvmsòng dvle wegø yúm we vle, wedø rvtø yàng góng íra we ínìnø wulaq bvnlì taq gvza yak lvm íe wàe.

WFP mvdòí shønò we taq vnà zìnlì shini màvkøn ke (10) chøm taq kèní (6) chøm dvngè nø vhàraq dat zidang vl dø mvlúnò we íe.

  Covid-19 rvtnø dvshá hok vhø'mò we vsvng té luqmvn shìwe íe. Vleámì nøng rvwe kèní myenmar móngdàn vrvm taq (5) chøm taq kèní (4) chøm nø vnà zinlì vkøn we rvtø

taq gùngwe gvmsòng (50)% yawvt dvngtè sóm we svng shálún shìwe nvng cømsaq mòngzøl lvm dvpvt vtoqvtip we svng nvlò we ínìnø svríbvng we dang téluq lvm wa íe

wasvng WFP mvdò kèní nøngmaq shvngbè sháìe wanø Andàsiní shvdúmò we kà shøn bøàwe íe.