Myanmar móngdàn móng dvjà dvpat vjúrøtā dvbang we Philippines móngdàn nvng Milan svrado gøwrwangrì.

Myanmar móngdàn móng dvjà dvpat vjúrøtā dvbang we Philippines móngdàn nvng Milan svrado gøwrwangrì.

  Myanmar móngdàn taq bøngwe móng vsvngrì kaq shvnip shvnvrwe nvng móng vsvngrì kaq shvtwe, mòngzøl lvm, democracy nvng vdu vbóngwe dvrá svng vrang lúnlvm dvpat Philippines móngdàn nvng Italy móngdàn Milan svrado gøwrwangrì taqkèní vjú røt dvbangā we lìpùng wàlvm dvgø bøà we íe.

  Philippines móngdàn Catholic svrado àngké gomvti (CBCP) taqkèní gø May 30 (labán) ni taq móng vsvngrìí Myanmar móngdàn móng dvjà dvpat vjúrøt dvbangā lvm (CBCP) shølshú vgo svrado Romulo Valles taqkèní May 26 ni taq dvkám bøà we íe.

  February 1 ni taqkèní mìn pyindvp:î móngdàn āna svng tøl bøà nø móng vsvngí rvsvng bøà we vsúyaq svng dvjá bøà we mvtaq móng øpshú vgomè Daw Aung San Suu Gyi svng gø tvpbøà we yáng kèní móngdàn vdòng vzi vrùng wanø mòng mvzølwe dvbung bøà. Mìn pin vsú yaqí gø àngmaq svng vgám we móng vsvngrì kaq shvtwe yúm vtang móng vsvng 830 íbøì.

   Noqngøm chømrì kaq vré shìwe Yalòng bvnchvt nø mìn pindap nvng móng dvcì dvgøngrì dvhø tasvng vshvt lvm tvrà svng dvbung:vtnàwe gø íe. Bukdaq noq vsvng mvlúngka vlwe Myanmar móngdàn vdòng taq Christian kám vsvng, rvcángcèrì nø móngdàn vsvng gorø (54) sé sèn vlwe vdòng kèní (6.2%) wa vl we íe.

  Mìn pindap kèní shvnip shvnvr we nvng mà dvrádø øpwe vdòng Kachin, Kayáh, Kayin, Chin dø íwe dvcì dvgøngrì àngsé mvzuq nøngrì mvme vl ráìnø we dvcì dvgøngrì mvlúngka nø Christian, rvcángcè kám vsvngrì gø íe. Myanmar móngdàn 3 wál tiq wál, móngdàn dvrøt shvràrì taqnø we dvcì dvgøngrìí roqgvr:ò we gø íe.

   Dènila bønwe móngdàn dvjà ratnø móng vsvngrì tiqmaq taq móngdàn vtáng svng yvlshì lvm dvkángshìwe, móngdàn vdòng mvjàn yvlshì (yàm bàn bàn we) rì gvzà vl ráì. wewa mvtaq rvcángcèrì tiqmaq nø noqngøm chøm kùlwàngrì taq dvgø shìnø vl vdu ráì wegø íe.

Wedø íwe vdòng mìn pindap kèní wedø noqngøm chøm kùlwàngrì kaq gvsatwe, vréshì we svng wàvtnà. Myanmar móngdàn nvmsvrlvp vlwe Kayáh móngwál, Loikaw myoq shvnvng Catholic shvngømré noqngøm chøm svng vleá:mìwe lvbán yaqtaq āna tølwe mìn pindap kèní shvnat mvzø gvbàí wvp:mòwe rat shvngømré móng vsvng (4) gø shì, ( gø dam:á lúnbøà we íe. Weratnø svradorìò àngké vgo Cardinal Chairle Bo taqkèní gø wedø noqngøm chøm kùlwàngrì kaq vréshìwe, gvsatwe mvwà lvm dvkám bøà wegø íe. Myanmar móngdàn svrado àngké mvdò (Catholic Bishops’ Conference of Myanmar - CBCM) shølshú vgopè Cardinal Chairle Bo taqkèní wedø vréshìwe bvnlì svng shvyømwe, mvtaq welòngnø gvzàni nøyòl lvm tvrà svng nvrlvm May (25) ni taq dvkám bøà we gø íe.

Cardinal Chairle Boò dvkám kàru svng vtàng we.

  Wedø Cardinal Chairle Boò tvnùng kàru nø móng vsvngrìò dvshá mvhøtwe shìwvtrì svng shvng shvng wa vtàn bøà wanø svrado gvbà Valles í kàru kèní vrá tiq dvtang vtàn bøà.

    "Myanmar móngdàn vsvngrìò dvshá mvhøtwe shìwvtrì svng shvngkà tìyørì taqkèní yánglún, shálún:ìe. Yadø mvrà mvvl móng vsvngrì dvpat tiqni mvdàm tiqni nøt dvshà lvm bøn dvzvŕ:òe". Wanø Philippines móngdàn Catholic svrado àngké mvdò vgopè Valles taqkèní Myanmar móngdàn móng dvjà dvpat vjúrøt dvbangā we kàru tiqlòng shvlang:vtnà.

  Dènila vdòng móng vsvngrì taqkèní vrá mìn pindap svng vgámwe mvjàn ratnø Kayáh móngwál vdòng chømgùng (60), vsvng (300) rvzé gønø we Loikaw noqngøm chøm kùlwàng wàng taq dvgø shìnø vl vdu we rvtø bùm:í wvpmò we svng shálún shìe.

  Wewa mvtaq Demósuq taq vlwe St. Joseph Catholic noqngøm chøm svng gø May 26 ni taqshvnat gvbàí wvpmò we svng gø shálún shìe.

Milan svrado gøwrwang

  Yanila Italy móngdàn Milan svrado gøwrwangrì taqkèní gø Myanmar móngdàn móng dvjà dvpat May 29 ni taq vjúrøt dvbangā we lìpùngmè svng wàbøà wanø shálún shìe.

Source:vaticannews