Myanmar móngdàn Myitkyina Catholic Diocese vdòng vm:aq pvnrì dvbang shìbøì we shvngkà

Myitkyina svrado gørwang, parishes 25 gørwang taq Covid 19 yóga zønlì vkøn we rvtø vm:aq pvnrì zíò we taqkèní dvbang shìbøì. Asúyaq nvng dvcìcèrì dvhø vzivrùng wanø mvjànrì dvbungò we taqkèní vdèò chøm, cúnwángrì gurònø yølshì ràá:mìwe dvcìrì dvhø yadø íwe yóga zønli gø vkøn ráì.

Myitkyina taqkèní Fr. Paul Wanghte Lúm Dau, Chancellor of Myitkyina Diocese íshønò we taq "Kachin State vdòng taq yóga zønli ratnø bvnlì màdá íwe vsvngrì gvzà luq ráìnø yakwe vhømò we ínø Parishes shvrúng shú jaurì taq kèní dvbanglvm røt shìráì" wae.

Asúyaq kèní yóga vgám lúnlvm dvpat dvrá gvl bøa mèpvng Svrado Francis Daw Tang í svrado gørwang vdòng Covid 19 Response mvdò svng poqpvng bøa we íe. Socio-pastoral Coordination róng bvnlì shølshúpè Fr. Noel Naw Lat taq kèní nvngøp wvm, wvl dvchøp, thermometer nvng wvl dvshàntìrì dvbang lvm dvkám bøa.

" Ya dvbang dvrèrì taq kèní rìngzì rvgaq svng tùbum lúnshìlvm dvdamòe" wanø shøe. Svrado Francis Daw Tang shønwe taq móngdàn vdòng mvjàn yølshìwe vsvngrì í téwa dvshà mvhøt lvm vhømòe mvtaq yóga zønli vkøn wegø vhøm lúngà wae.

Vle ámìwe May shvlá taq NGO, UNICEF nvng shiqshàn mvdòrì taqkèní tùbumshì mvdò kaq svng shvngøt dvtúòrì wá pvng bøa we íe. We mèpvng 25 gørwang kaq svng dinø bøàwe shvngkà rìsvng gø Radio Veritas Asia shvngkà dap kàpvn 25 pvn taq kèní vrìng bøa we íe.

RVA News