Myanmar móngdàn shvngømré vrvm vgorì taqkèní móngdàn vdòng mòngzøl lòng lúnlvm røtshìwe shvngkà

Myanmar móngdàn shvngømré vrvm vgorì taqkèní móngdàn vdòng mòngzøl lòng lúnlvm røtshìwe shvngkà

Myanmar móng Shvngømré vgorì taq kèní móngdàn vdòng vrám vrá lvm, tasvng vpø shvringvmlvm nvng Rvkhaine móng káng móngrì taq bøn we mvjànrì shvla wa gún dvtøp nø narlvm svng tvnùngò nø røtbøa we íe. July 13 ni taq tvnùng bøa we shvngømré vgorì òkàru taq mvjàn yàrì taq kèní tasvng vzingkéì nø nøt vyàngkélvm svng vpo ráì wanø dvkám bøawe íe.

liCas.news taqkèní dvshvngvtnà we taq móngdàn vdòngtaq shvngømré vgorì nvng vsúyaq tvsvng vpø kèweí mvngushìnø mòng vsvngcèrì vjú dvpat vrashì lvm røt bøa wanø yánglún shìe. Coronavirus yóga zønlì vkøn we rvtø taq mvjàn bung dvzvŕ werat yalvbán vdòng taqni svngpvn vko vkáng bvnlì wawe mvdo taq kèní shvdøm we lìga tvnùngvtnàwe íe.

Vle:ámì lvbán taq Amnesty international mvdo taqkèní mvjàn bønwe shvràrì taq móng vsvngrì tapmòwe, shvnip shvnarwerì svng shvkse gún dvtøp shìwe íe wanø shønvtnà. Shvngømré vgorì taq kèní gø wedø vzi vrùng wanø mvjàn dvbungòwe rìsvng mvrà zíràwe svng dvkám bøa.

Mìn pindvp kèní øpkángwe dang, dvrá jeyangwe dang rìtaq vdu vbóng dø mvwá shìwe svng gø nøt mvbyo lvm vle wanø shøne. Lòngsíng pvga, vrù rapvnrì nvmvm we taq kèní vjú vmyatrì vmwe øpshú vgorì nvng Cronies rìsvng mvra zíràwe svng tvnùngò we íe.

Àngmaqí tvnùngvtnàwe statement taq tuqrawe November vsúyaq rvsvng lvm boy lòngnø móngdàn vlíng vpo shì lúnlvm dvpat gvzà vchyak we íe. Yalòng nø vdè móngdàn dvpat 60 nø dvhø 3 baq wapaq móng øpshú rvsvngì we boy ílonge. Móngdàn gvsa 1171 gø ígø móngdàn shvrà kayáng màyáng gø vzi vrùng wanø mòng mvzøl wanø tvnùngòwe íe.

Wedø írat Christian, Muslim nvng Buddhistrì shvngbe gø vzømnø bvnlì wáràwe svng tvnùngò weíe. Myanmar móngdàn vdòng møngzøl lòng kadvgvp lúnlvm íemá? Kagø taq bvnlì døngjá vlwe íma? Wanø shvngømré vgorì taq kèní røt bøa we íe.

Móngdàn vsvngrì lún vdu we vko vkángrì mvlúnò nø vshuqdø wá dvzvŕòwe gø gvzà vlévm:mì. Mèpvng dvpat múng vsvngrìò shiqshàn lvm dang, lún vduwe vko vkángrì kadø zí vduwe svng àngmaq røtshìwe kàrurì røa ràe. Nøngmaq dvhø tasvng vzivrùng wàì nø vshat-ì we nø vdè rvgaq svng gvyaq shàìwe ínø vlu vlàngcèrì dvhø taqøgø vru ra pvn ám:aq lvmrì taqkèní lvpat rì gvzà søman shìwe mvtaq móngdàn vtáng svng gø vdècèrì gvzà vl vdunø lvpat tin wegø gvzà vhømòe. Móngdàn mòngzøl lvm dvpat shvrám shvráwe bvnlì rìgø màdvrá døwa wáshìe. Àng maqí mvjànrì tiqlang narò dvgvp mvløng shøngsárì tølvmòe, móng zaqshøprì køvmòe wanø shvngømré vgorìí tvnùngvtnàwe íe. Vzivrùng wawe mvdòrì shvngbe svng shvrám shvrá lvm mvdøng vchyak á:mì wanø shvngømré vgorì taqkèní yadø yóga zønlì vkøn we rvtø vlebø mèpvng móngdàn svng dvsøp shvnvp lvm dang røt dvtú bøa.

#rvanews