Myanmar móngdàn Svrado àngké mvdò í ám:aq vnvt shìnø vjú røt lvm dvkám we tvnùng kàru

Myanmar móngdàn Svrado àngké mvdò í ám:aq vnvt shìnø vjú røt lvm dvkám we tvnùng kàru
Tuqrawe 7.2.2021 lvbán ni taq shvngømré shølshú rìnvng shvngømré rì kaq svng we ni taq ám:aq vnvt shìnø vjú røt lvm dvkám bøà.
We dvkám kàru svng shvngømré shølshú rìnvng shvrúng shú rì taqkèní vjø røt tìyø taq lángshì nø shøl lvm svrado àngké vgo pè Cardinal Charles Bo taqkèní dvkám bøà we íe.
Shvrúng shú rì yani la bøn we móng lvmang nvng singwe jømciqrì taqkèní rø nø pvlàcè nvngòn Lu shìlvm gø dvkám we íe. February 3 ni taq Cardinal Charles Bo í tvnùngvtnà we shvngkà taq gø vtù vrè we ku mø:í dø vgám lúnlvm svng dvkám we íe.
Cardinal àng dvtut shøn we taq møngzøl lòng taqkèní wa móngdàn tiqlòng nø vzàng kaq shvla dø dílún lvm íe wae.
Cardinal Charles Bo taqkèní nvngòn ziwe taq yadø móngdàn svng dølòngí køpmò we kèní lutshì lúnlvm dvpat rvtø vrvm vjúrøt dvzaqshì ràwe dang vtàn bøà.
Móngzøngcè rì taqkèní ngúng, shvwi gvzà zíshì bøì we rat ya rvtø taq nø shoq màwácè ku vgám lvm rà á:mì.
Yangon svrado àngké vgo pèí tvnùngò we taq yanila vkøn we zønli svng gø vgám lúnlvm dvpat vjúrøt dvzaqshì ràwe nvng cì svra/ maq rì kaq gø móng lvmang taq nøt mà dvcvmshì nø mvngan dvzaqshì lvm ràwe dang dvkám bøà we íe.
Àng taqkèní pin vsúyaq pè svng dvkám we taq " móngzøng cèrì ò dvgùng nvng mòngzøl lòng svng vpø shvring shì ràe".
"Nøngmaq shóng shàì we móngdàn svng vré shìwe mvwà lvm, dènila  tvpbøā we móng vsvng gvsa rìò dvgùng rì svng vpøā lvm dvkám we íe.
Pin vsúyaq pè í tap bøà we Parliament shaqré rìsvng gø shvlut lvm dvtú bøa we íe. 
Wedø Parliament àngshvr poqpvng lúnlvm dvpat dvgø shìwe rvtø taq ni Pin dap kèní āna vtøl bøā we íe.